ଅଜଣାରୁ ଜଣା ହୋଇଗଲା ପରେ
ଅରପି ଦେଲି ମୋ' ମନ
ଅନ୍ଧାର ରାତିରେ ମୋ' ପାଇଁ ତୁ ହେଲୁ
ଅଜବ ପୁନେଇଁ ଜହ୍ନ ॥
ଅଧାଲେଖା ଗୀତ ଅଧାରେ ରହିଛି
ଅଧାରୁ ତୁ ଚାଲିଗଲୁ
ଅଲିଭା ଦୀପାଳୀ ତୋ' ପାଇଁ ପ୍ରିୟା ଗୋ
ଅନ୍ଧାରେ ରଖିଛି ଜାଳି ॥
ଅସରା ଲୁହକୁ ଆସରା କରିଛି
ଅସରନ୍ତି ତୋର କଥା
ଅଭାବି ମନରେ କାହିଁକି କହଲୋ
ଅଜାଡି ଦେଲୁ ତୁ ବ୍ୟଥା ॥
ଅସାର କରି ତୁ ଜୀବନଟା ମୋର
ଅନ୍ତର ଛଡେଇ ନେଲୁ
ଅତର ମହକେ କିଛି ସମ୍ମୋହନ
ଅଜାଚିତେ ଦେଇଗଲୁ ॥
ଅଳସୀ ନଈର ଘାଟରେ ତୋ' ପାଇଁ
ଅଧିରେ ରହିଛି ଚାହିଁ
ଅଳକାପୁରୀର ରାଜନନ୍ଦିନୀ ଗୋ
ଅସରନ୍ତି ଇଚ୍ଛା ନେଇ ॥
କବି ଓ କବିତା ଭବନ
ମହୁଲ, ଅଙ୍ଗାରପଡା, ଖୋର୍ଦ୍ଧା
ଦୂରଭାଷ - ୮୧୧୪୬୦୯୨୮୦
