ମେଘକୁ ଓଢଣୀ କରି ।
ଘଡ଼ଘଡି ଭାଇ ତା' ସାଥିରେ ଥିଲା
ବିଜୁଳି ଭଉଣୀ ପରି ।।
ସରାଗରେ ତା'କୁ ଗାଆଁର ମୁଣ୍ଡରୁ
ବନ୍ଦାପନା କରି ନେଲି ।
ପିଠା ପଣା କ୍ଷୀରି ଖେଚୁଡ଼ି ଅନ୍ନରେ
ଉତ୍ସବଟି ପାଲିଥିଲି ।।
ତା'ର ଭଲକଥା ଜଗତଟି ସାରା
ତୁଣ୍ଡକୁ ତୁଣ୍ଡ ଗଲା ।
ସେହି କଥା ଶୁଣି କୁଣ୍ଢେମୋଟ ହେଲି
ପାଦ ତଳେ ନ ଲାଗିଲା ।।
ବିହନ ବୁଣିଲି ଫଳିଲେ ପୂଜିବି
ରୋଇ ଚାରା ଧାଡିଧାଡି ।
କୁଆଡେ ଚାଲିଲା ନ କହି କାହାକୁ
ଦାଣ୍ଡ ବାରି ଫାଟେ ରଡି ।।
ନ କହି ନ ପୁଛି ଯିବାର କାରଣ
କିପରି ଜାଣିବି ମୁହିଁ ।
ଆଷାଢ଼ ସରିଲା ଶ୍ରାବଣ ପଶିଲା
ଏ ପର୍ଯ୍ୟନ୍ତ ଦେଖାନାହିଁ ।।
ଯାଉଛି ଥାନାରେ ନିଖୋଜ କଥାଟି
ଜଣାଇ ଆସିବି ଏବେ ।
ଖୋଜିକି ଆଣିବେ ଛପିବା ଜାଗାରୁ
ମଜାଟି ପାଇବ ସେବେ ।।
କାହିଁଗଲେ ସେଇ ମୃତ୍ୟୁଞ୍ଜୟ ବାବୁ
ମହାପାତ୍ର ବୋଲାଉ ଥିଲେ ।
ଏହି ଶିକ୍ଷା ଦେଇ ପଠାଇଥିଲେ ସେ
ମୋର ସବୁ ସାରିଦେଲେ ।।
ପୋଡିବାକୁ ଯାଏ ମୋର କ୍ଷେତବାଡ଼ି
ରାଇଜ ସାରା ଏ ଦଶା ।
ଖୋଜି ଦେଇ ଆଣ ପାଛୋଟି ନେବି ମୁଁ
ଭୁଲି ତା'ର ସବୁ କଥା ।।
ଭୁଲଟି କାହାର ନ ହୋଇ ରହିଛି
ଏଇ ମର୍ତ୍ତ୍ୟ ମଣ୍ଡଳରେ ।
ଫେରିଲେ ଏଥର ଖୁଆଇ ରଖିବି
ମଣ୍ଡା ବରା ଚକୁଳିରେ ।।
ଫେରିବା ବାଟକୁ ଅନାଇ ରହିଛି
ନନ୍ଦ ସମ ଏହିଠାରୁ ।
ପାହାଡ ଜଙ୍ଗଲ ପୁର କ୍ଷେତ ବାଡ଼ି
ଶସ୍ୟ ସମ୍ପଦରେ ପୁରୁ ।।
ଚିକିଟୀ ଗଡ଼, ଗଞ୍ଜାମ
ଦୂରଭାଷ - ୮୨୪୯୪୮୬୪୫୫