ପିସିରେ ଚାଲିଛି ଶାସନ - ନରେନ୍ଦ୍ର ପ୍ରସାଦ ବେହେରା

ପିସିରେ ଚାଲିଛି ଶାସନ - ନରେନ୍ଦ୍ର ପ୍ରସାଦ ବେହେରା

ପିସି କାରବାରେ ଚାଲିଛି ଶାସନ
        କହିବି କାହାକୁ ମାଡୁଛି ଲାଜ
ଅସ୍ଥିର ହେଲାଣି ସଂସାର କଥା ଲୋ
      କେହିବି ବୁଝୁନି ହୋଇ ସଜବାଜ ।
ଚାରିଆଡେ ଖାଲି ଦୁର୍ନୀତିର ଗନ୍ଧ
     କହିଲେ ବାସନ୍ଦ କରିବେ ମୋତେ
ଗାଆଁ ଗହଳରୁ ସଚିବାଳୟ ଯାଏ
     ସମସ୍ତେ ଖୋଜନ୍ତି ମିଳିବ କେତେ ।
ପିସିରେ ଚାଲୁଛି ରାଜ୍ଯରେ ଶାସନ
    କରିଲେ କି ହେବ ମାନ ଅଭିମାନ
ଯେତେ କହିଲେ ବି ଶୁଣିବେନି କେହି
       ଉପରି ତାଙ୍କର ଅଟେ ଭଗବାନ ।
ସବୁକ୍ଷେତ୍ରେ ଚାଲେ ପିସି କାରବାର
         ନେତାଏ କୁହନ୍ତି ରାଜ୍ଯ ସୁନ୍ଦର
କାମଟିଏ ପାଇଁ ଦୌଡି ଦୌଡି ମରେ
       ପିସି ନ ଦେଲେ ପାଏନି ଚେୟାର ।
ଦେଇଥିଲେ ପିସି ପାଏ ନମସ୍କାର
    କହିବେ ପ୍ରଥମେ ଚା ଟିକେ ପିଅ
କରିଦେବି କାମ ରହିବନି ବାକି
  ପିସିରେ ମନକୁ କିଣି ନେଇଯାଅ ।
ଗରିବ ଗୁରୁବା କାନ୍ଦି କାନ୍ଦି ମରେ
     ଭାଗ୍ଯକୁ ଆଦରି ନେହୁରା ହୁଏ
ମନର ବେଦନା ବୁଝିବେନି କେହି
    ନ ପାଇଲେ ସେ  ପିସି ଟଙ୍କାଟିଏ ।
ନେତାଙ୍କୁ ଦେଉଛି ପିସି ବାରମାସ
     ସେଥିପାଇଁ ଡାକେ ପାଖକୁ ଆସ ।
କାମ ନହେଲେବି କରିଦେବି ବିଲ
   ମୋ ଠାରେ ଅଛି ସେଭଳି ସାହସ ।
ଅଫିସର ଏଠି ପିସିରେ ପାଗଳ
    କାମ ପାଇଁ ନୁହେଁ ସେ ସଜବାଜ
ଏମିତିରେ ଏଠି ଚାଲିଛି ଶାସନ
      କହିବି କାହାକୁ ମାଡୁଛି ଲାଜ ।

ନରେନ୍ଦ୍ର ପ୍ରସାଦ ବେହେରା
ଆଳଦା, ଖଇରା,ବାଲେଶ୍ବର, ମୋ-୯୮୫୩୧୪୨୫୧୦

0 Comments