ମୁଁ କୃଷକ - ଟୁକୁନା ସାହୁ

ମୁଁ କୃଷକ - ଟୁକୁନା ସାହୁ

ଲଙ୍ଗଳକଣ୍ଟିରେ ସଦା ମୋର ହାତ 
ବଳଦ ମୋହର ବନ୍ଧୁ 
ଭାଗ୍ୟକୁ ଆଦରି ବଞ୍ଚୁଛି ଜୀବନ 
ଦିନ ଯାଏ କାନ୍ଦୁ କାନ୍ଦୁ । 
ଖରା ବରଷାକୁ ନଥାଏ ଖାତର
ଦିମୁଠା ପଖାଳ ଖାଇ 
ବିଲରେ ଖଟୁଛି ସାରା ଦିନ ମୁହିଁ 
ଜଗତ ମଙ୍ଗଳ ପାଇଁ । 
ସଭିଙ୍କ ମୁଖରେ ଆହାର ଦେଉଛି 
ଯାନି ଯାତ୍ରା ଭୁଲି ଯାଇ 
ଭଲ ଲୁଗା ଖଣ୍ଡେ କିଣି ପାରୁନାହିଁ 
ଋଣ ପରିଶୋଧ ପାଇଁ ।
ସାତ ସିଆଁ ସେଇ ଖଦଡ଼ ଚଦର
ମୁଣ୍ଡରେ ପଗଡ଼ି କରି 
ଖୁସିରେ ଗାଉଛି ପ୍ରଭୁଙ୍କ ଭଜନ 
ଚାଷ କରେ ଥିରି ଥିରି । 
ମୋହର ଘରଣୀ ହୃଦୟର ରାଣୀ
ବୁଝେ ମୋର ମନ ବ୍ୟଥା 
ଦୁଃଖଭରା ମୋର ଜୀବନ କାହାଣୀ 
ଶୁଣିଲେ ଘୁରିବ ମଥା । 
ବୃଦ୍ଧ ପିତା ତୁଣ୍ଡେ ଦେବାକୁ ଔଷଧ 
ପାଖରେ ନଥାଏ ଧନ 
ପୁତ୍ର କନ୍ୟା ମୋର ରୋଦନ କରନ୍ତି
ଦିଏନି କେବେ ମୁଁ ଧ୍ୟାନ । 
କହୁଛି ଗର୍ବରେ ଏଇ ସମାଜରେ
ସଭିଙ୍କୁ ଆହାର ଦେଇ 
କଷ୍ଟମୟ ମୋର ଜୀବନ କାହାଣୀ 
କୃଷକ ନାମକୁ ବହୀ । 

ଟୁକୁନା ସାହୁ 
ସାନ୍ତରା ପଲ୍ଲୀ, ଗଞ୍ଜାମ 

0 Comments