ବାତ୍ୟା ଜନିତ ଅସୁବିଧା କାରଣରୁ କ୍ଷୁଦ୍ରଗଳ୍ପ ଓ କବିତା ପ୍ରତିଯୋଗିତାର ଫଳାଫଳ ମେ - ୧୦ ତାରିଖ ପରିବର୍ତ୍ତେ ଚଳିତ ମାସ ୩୧ ତାରିଖ ସୁଧା ଘୋଷଣା କରାଯିବ । ଏବଂ ଚଳିତ ମାସ ୨୩ ତାରିଖ ଠାରୁ କବିର ଘର ପ୍ରସ୍ତୁତ "ଆଜିର ଅତିଥି" କାର୍ଯ୍ୟକ୍ରମର ସାପ୍ତାହିକ ପ୍ରସାରଣ ସେବା ଆରମ୍ଭ ହେବ । ଅନିଚ୍ଛାକୃତ ଅସୁବିଧା ନିମନ୍ତେ ଦୁଃଖିତ ।

ଏ କେମିତିକା ଧର୍ମ ତୋର - ସସ୍ମିତା ସାହୁ

ଏ କେମିତିକା ଧର୍ମ ତୋର - ସସ୍ମିତା ସାହୁ


ଉପାସ ରହିଲୁ ହବିଷ କରିଲୁ
 ଆମିଷ ଛାଡିଲୁ ତୁହି,
ବୁଡ଼ ପକେଇଲୁ ଚଉରା ପୂଜିଲୁ
 ଧୂପ ଦୀପ ଭକ୍ତି ଦେଇ ॥
ମନ୍ଦିରକୁ ଗଲୁ କ୍ଷୀର ବି ଢାଳିଲୁ
 ଶିବଙ୍କ ଲିଂଗରେ ଯାଇ ,
ଫୁଲ ଫଳ ଦେଇ ମୁଣ୍ଡିଆ ମାରିଲୁ
 ଠାକୁର ପାଖରେ ତୁହି ॥
ଧର୍ମ ମାସ ବୋଲି ସବୁ ତୁ ମାନିଲୁ
 ଧର୍ମ କିଆଁ କଲୁ ନାହିଁ,
ବୁଢା ବାପା ମାଆ ଦିଟାକୁ ତୁହି
 ଭୋକରେ ରଖିଲୁ କାହିଁ ॥
ନୀତି ରୀତି ସବୁ ମନେ ରଖିଲୁ ତୁ
 ଛୁଆକୁ ତୋ ଭୁଲି ଗଲୁ,
ଅଝଟ କରିଲା ବୋଲି ପିଲାଟା ତୋ
 ଝାଡ଼ୁରେ ତାକୁ ମାରିଲୁ ॥
ପୋଥି ପୁରାଣ ତୁ ଭଲରେ ପଢ଼ିଲୁ
 ଦୁଃଖୀଙ୍କୁ ଶୁଣିଲୁ ନାହିଁ,
ଖାଲି ଥାଳି ନେଇ ଫେରି ଗଲା ସିଏ
 ନ ଦେଲୁ ଚାଉଳ ତୁହି ॥
ମୁରୁଜ ପକେଇ ସୁନ୍ଦର କରିଲୁ
 ଚଉରା ମୂଳକୁ ତୋର,
ଗୋରୁ ଗାଈଙ୍କୁ ତୁ ତୋରାଣି ଦେଲୁନି
 ଏ କେମିତିକା ଉପଚାର ॥
ଅତିଥିଙ୍କ ସେବା ଭଲରେ କଲୁନି
 ମନେ କଷ୍ଟ କିଆଁ ଦେଲୁ,
ଧରମ ମାସରେ ମଣିଷ ଧରମ
 କରିବାକୁ ଭୁଲି ଗଲୁ ॥
ମାନବ ସେବା ହିଁ ମାଧବ ସେବା
 ପ୍ରକୃତ ଧରମ ଅଟେ,
ମରମକୁ ବୁଝି କରମ କରିଲେ
 ସୁଖରେ ଜୀବନ କଟେ ॥
କର୍ମ ହିଁ ଈଶ୍ୱର କର୍ମ ହିଁ ଧରମ
 କର୍ମ ସବୁଠାରୁ ଉଚ୍ଚ ,
କର୍ମ ଅଟେ ପୂଜା କର୍ମ ଉପାସନା
 କର୍ମ ବିନା ସବୁ ତୁଚ୍ଛ ॥

ସସ୍ମିତା ସାହୁ, ନାଶିକ, ମହାରାଷ୍ଟ୍ର

0 Comments