ଓଡିଆ ବୋହୁ - ଅଞ୍ଜନା ନନ୍ଦ

ଅଞ୍ଜନା ନନ୍ଦ

---

ଗେଲବସରର ଦିନ ସରିଗଲା

କନ୍ୟାରୁ ହୋଇଲି ବଧୂ

ପରକୁ ଆପଣା ସ୍ନେହେ ପ୍ରେମେ କଲି

ବରଷିଲା ଖାଲି ମଧୁ ।

ପ୍ରଭାତୁ ଉଠିଣ ଗୋମୟ ସିଞ୍ଚିଲି

ଦୁଆର ଅଗଣା ସାରା,

ମୁଖ ପ୍ରକ୍ଷାଳନ ଗୃହ ପରିଷ୍କାର

ଆସିବା ଆଗରୁ ଖରା ।

ଶୌଚାଦି କରମ ନିତ୍ୟ ପୂଜା ପାଠ 

ସାରି ମୁଁ ଯତନ ଭରେ

ଶାଶୁ ଓ ଶ୍ଵଶୁର ପିତା ମାତା ମୋର

ଆଶୀର୍ବାଦ ଭିକ୍ଷା କରେ ।

ଧୀରେ ଧୀରେ ଯାଏ ରୋଷେଇ ଘରକୁ

ରାନ୍ଧଣାରେ ଦିଏ ମନ 

ଜଳପାନ ଆଉ ମଧ୍ୟାହ୍ନ ଭୋଜନ

କରେ ସର୍ବ ଆୟୋଜନ ।

ଏହି ନିତ୍ୟ କର୍ମ ସବୁ ଦିନ ଥାଏ

ତା'ପରେ ଅନେକ ଅଛି

ବ୍ରତ ଉପବାସ ପିଠା ପଣା ଭୋଗ

ସବୁ କରେ କିଛି କିଛି ।

ପରିବାରଟିକୁ ସ୍ୱର୍ଗ କରିବାକୁ

ସବୁ ଦୁଃଖ ସହି ଯାଏ

କଟୁ କଥା କହି କାହାରି ମନରେ

ଅଶାନ୍ତି କେବେ ନ ଦିଏ ।

ରୋଗରେ ପଡିଲେ ମୋ ଘରେ କେହିବି

ରଖିଥାଏ ମୁଁ ନଜର

ସେବା ଶୁଶ୍ରୁଷାରେ ଉଣା କରେ ନାହିଁ

ଥାଏ ପଛେ ଉଜାଗର ।

ତଥାପି ଏତିକି ଯାହା ମୁଁ କରିଛି

କହିଦେଲି କହୁ କହୁ

ପସନ୍ଦ ଆସିଲେ କହିଦେବ ଥରେ

ମୁଁ ଓଡ଼ିଆ ଘରର ବୋହୁ 

ମୁଁ ଓଡ଼ିଆ ଘରର ବୋହୁ ।

କେନ୍ଦୁଝର, ଓଡିଶା

---

VOL.IX,  ISSUE.IV,  APRIL-2025

Published By Banamallira Mahak