ଲକ୍ଷ୍ମଣ ରେ କିଶୋଭା
ଦିଶେ ଏ ବନ
ବହୁଛି ମନ୍ଦ ମଳୟ ବାସୁଛି ଚନ୍ଦନ
ଲକ୍ଷ୍ମଣ ରେ କିଶୋଭା ଦିଶେ ଏ ବନ ॥୦॥
ଫୁଟିଛି ନା ନା କୁସୁମ
ସରଗ ଉଦ୍ୟାନ ସମ
ଚୂତଡାଳେ ପିକ କରେ ପଞ୍ଚମରେ ଗାନ
ଲକ୍ଷ୍ମଣ ରେ କି ଶୋଭା ଦିଶେ ଏ ବନ ॥୧॥
ମଲ୍ଲୀ ମାଳତୀ ଟଗର
ଜୁଇ ଜାଇ କୁ ମନ୍ଦାର
କୃଷ୍ଣଚୂଡ଼ା ସଙ୍ଗେ ହୁଏ ପଳାସ ଉଚ୍ଛନ
ଲକ୍ଷ୍ମଣରେ କିଶୋଭା ଦିଶେ ଏ ବନ ॥୨॥
ସରିତ ଯାଉଛି ଝରି
ବିମ୍ବିତେ ଖେଳେ ଲହରୀ
କୁଳୁ କୁଳୁ ତାନେ ଦେଖ ମୋହିନିଏ ମନ
ଲକ୍ଷ୍ମଣ ରେ କି ଶୋଭା ଦିଶେ ଏ ବନ ॥୩॥
ଦୂରରେ ଦେଖ ସରସୀ
କି ସୁନ୍ଦର ଜଳ ରାଶି
ସରସିଜ କୋଳେ ଶୁଭେ ଭ୍ରମର ଗୁଞ୍ଜନ
ଲକ୍ଷ୍ମଣ ରେ କି ଶୋଭା ଦିଶେ ଏ ବନ ॥୪॥
ହରିତ ବର୍ଣ୍ଣ ଏ ବନ
ମର୍ତ୍ତ୍ୟେ ନନ୍ଦନ କାନନ
ସଦା ବସନ୍ତ କି ଏଠି କରେ ବିଚରଣ
ଲକ୍ଷ୍ମଣ ରେ କିଶୋଭା ଦିଶେ ଏ ବନ ॥୫॥
ନାହିଁ ଏଠି ହିଂସା ବାଦ
ମୃଗ ସାଥେ ଭ୍ରମେ ବ୍ୟାଘ୍ର
ଶିଖୀ ନିକଟେ ଭୁଜଗ କରିଛି ଶୟନ
ଲକ୍ଷ୍ମଣ ରେ କି ଶୋଭା ଦିଶେ ଏ ବନ ॥୬॥
କେଉଁ ପୂଣ୍ୟ ବନ୍ତ ସତେ
ରହିଛନ୍ତି ଏ ବନସ୍ତେ
ନାରାୟଣ ଭାଷେ ସେହୁ ଦେବତା ସମାନ
ଲକ୍ଷ୍ମଣ ରେ କି ଶୋଭା ଦିଶେ ଏ ବନ ॥୭॥
ରାମେଶ୍ୱର, ଖୋରଧା
