ଜୀବନଟା ଫେଣ୍ଟାଫେଣ୍ଟି
ସମୟ ରାସ୍ତାରେ ଆଶା ନିରାଶାର
ଅସଂଖ୍ୟ ମାଇଲି ଖୁଣ୍ଟି ॥
କେବେ ଆଶା ଆଉ କେବେ ବା ନିରାଶା
ଆସି ପୁଣି ଯାଏ ଚାଲି
ଚଲାପଥ କେବେ ସବୁଜ ବନାନୀ
କେବେ ପୁଣି ମରୁବାଲି ॥
କେବେ ସୁଶୀତଳ ଝର ଯାଏ ଝରି
କେବେ ବା ଆଗ୍ନେୟ ଗିରି
ଚଲାବାଟେ କେବେ ହସର ଜୁଆର
କେବେ ଆଖି ଆସେ ଭରି ॥
କେବେ ବା ନିଜର ପର ହୋଇଯାଏ
ପର ହୁଏ ଆପଣାର
ଜୀବନତ ବଡ଼ ବିଚିତ୍ର ଗଣିତ
ଯୋଗ ଭାଗ ଵିୟୋଗର ॥
କେବେ ସୁଖ ପୁଣି କେବେ ଦୁଃଖ ମୋଡ଼
ଆସି ପୁଣି ଯାଏ ଚାଲି
କିଏବା କହିବ କି ସନ୍ଦେଶ ଆଣି
ଆସିବ ଆସନ୍ତା କାଲି ॥
ଧୂପଟିଏ ପରି ମହକ ଖେଳାଇ
ନିଜେ ଗଲେ କେବେ ଜଳି
ଝରା ପାଉଁଶ ତା ଫୁଲ ହୋଇ ଆମ
ପଥେ ଦେବ ଶ୍ରଦ୍ଧାଞ୍ଜଳୀ ॥
ନାସିକେଶ୍ୱର, କାକଟପୁର, ପୁରୀ
