OUR READERS STATUS AROUND THE GLOBE : INDIA-362119 CANADA-354 CHINA-881 FRANCE-1727 GERMANY- 2083 QATAR - 61 SINGAPORE - 1114 UNITED STATES - 14819 UNITED KINGDOM - 553 UNITED ARAB EMIRATES - 926 UKRAINE-47 UNKNOWN REGIONS-5627

ବ୍ୟଙ୍ଗ କବିତା - ଡାକବାଜି - ସଲିଳ କୁମାର ସ୍ଵାଇଁ

ବ୍ୟଙ୍ଗ କବିତା - ଡାକବାଜି - ସଲିଳ କୁମାର ସ୍ଵାଇଁ


ରାତି ଚାରିଟାରୁ ମାଇକିରେ ବାଜେ
  ଗୋପାଳ ସହସ୍ରନାମ
ପାହାନ୍ତିଆ ନିଦ   ଭାଙ୍ଗିଯାଏ ଆମ
  ପବିତ୍ର ହୁଅଇ କର୍ଣ୍ଣ ।
ଗୀତାଭବନରେ କମଳା ମଂଦିରେ
  ଡାକବାଜି ବାଜେ ନିତି
ପେଟ ପୁରିଉଠେ ଏ କଳିକାଳରେ
  ଦେଖି ଈଶ୍ୱର ପୀରତି ।
ବଡି ଅନ୍ଧାରରୁ     ଚୁଚା ଉଠିଯାଏ
  ମଣିଙ୍ଗ ଓ୍ଵାକରେ ଯାଏ
ଗାଧେଇପାଧେଇ  ମଂଦିରକୁ ଯାଇ
  ଚନ୍ଦନ ତିଳକ ନାଏ ।
ଦିନ ବେଳଟାରେ   ଲାଉଡୁ ସ୍ପିକର
  ଜାଗାଅଜାଗାରେ ବାଜେ
ଶିକ୍ଷା ଅନୁଷ୍ଠାନ     ଡାକତରଖାନା
  ଭିତରେ ଶବଦ ଗୁଂଜେ ।
ରୋଗୀର ଯନ୍ତ୍ରଣା ବିଦ୍ୟାଳୟପଢା
   ହୁଅଇ     ପରଭାବିତ
ଫୁଲୁ ଭଲୁମୁରେ ଗୀତ ବଜେଇବା
   ଅଧିକାର    ଜନ୍ମଗତ ।
ମଠାଯୋଡ ପିନ୍ଧି  ଖୋଳଗିନି ଧରି
   ଅତି   ଧରମାନୁରାଗୀ
ମନ୍ଦିର ପ୍ରତିଷ୍ଠା      ଜାଗଯଜ୍ଞ ପାଇଁ
  ଅଟରେ ଆସନ୍ତି ମାଗି ।
ନଡ଼ିଆ ଚାଉଳ      ପଇସା ସୁନ୍ଦୁର
  ଯାହାଦେଲେ ତାହାନେବେ
ମାଇକି ଫଟେଇ ଦାତା ନାଆଁଡାକି
  କଇଲାଣ କରୁଥେବେ ।
ସଂଜ ନଇଁଗଲେ  ଭଗତ ଘରରେ
  ଡାକବାଜି  ଲଗାଅନ୍ତି
ସାଇରେ ସାଇରେ ମଠ ମନ୍ଦିରରେ
  ଉଚ୍ଚସ୍ଵରେ ରଡୁଥାନ୍ତି ।
ପାଠପଢା ନଷ୍ଟ     ହଉ ପିଲାଙ୍ଗର
  ବୋପା'ତ ଜଂଜାଳମୁକ୍ତ
ଗଭୀର ଗିଆନ     ରଡୁଚି ପୁରାଣ
  ହେବାକୁ   ଈଶ୍ୱରପ୍ରାପ୍ତ ।
ଆସିଲେ ବାରାତି  ଗାଆଁକୁ ଆମର
  ଡିଜେ ଦୁଲୁକାଏ ଛାତି
ଦୁଲୁକାଏ ଘର    ଫାଟିଯାଏ କାନ
  ନାହିଁ ଜ୍ଞାନ ନାହିଁ ଗତି ।
ଇସ୍ତାହାର ଦେବେ ପଙ୍କଫିଙ୍ଗାଫିଙ୍ଗି
   ଆସିଲା  ନିରିବାଚନ
ସାକାଳ ଆଆଠୁ ସଂଜ ସାତ ଯାଏଁ
  ଉଠିବପଡିବ  ଗ୍ରାମ ।
ବରଷ ତମାମ   ଦିନରେ ରାତିରେ
  ଶବ୍ଦ ପ୍ରଦୂଷଣ ହୁଏ
ପୁଲିସି ନୀରବ     ସ୍ଥାଣୁ ପ୍ରଶାସନ
  କହିଲେ ଶୁଣିବ କିଏ ?
ଆଇନ ତିଆରି ଆମେ ତ କରୁଚେ
  ଭାଙ୍ଗିବା ବି ଆମ କାମ
ସଲିଳ ସିଲଟ     କରଇ ଗୁହାରୀ
  ଛାଡରେ ମାଇକି ପ୍ରେମ ।

ସଲିଳ କୁମାର ସ୍ଵାଇଁ, ଶିକ୍ଷକ
ସୁନ୍ଦରପୁର ପ୍ର ଉ ପ୍ରା ବିଦ୍ୟାଳୟ
ସୁନ୍ଦରପୁର, ଖୋରଧା, ଓଡିଶା

0 Comments