ବିଷମ ଗ୍ରୀଷମ ତାଡନା ଅସୀମ
ଅତିଷ୍ଠ ହୋଇଲା ଧରା,
କୋମଳ ତନୁରେ ଶୀତଳତା ଲାଗି
ମଉସୁମୀ ଆସେ ପରା ॥
ବରଷା ପରଶେ ତରୁଲତା ହସେ
କଅଁଳେ ନବ ପଲ୍ଲବ,
ମାଟି ପୁଷ୍ପବତୀ ପୂର୍ଣ୍ଣଗର୍ଭା ନଦୀ
ପୁଷ୍ପ ବିତରେ ସୌରଭ ॥
ବନେ ଉପବନେ ମୟୂର ନାଚଇ
ଭେକ ଡାହୁକଙ୍କ ରଡି,
କେଦାରେ କେଦାରେ ସବୁଜିମା
ଭରେ ରଥଚକ ଯାଏ ଗଡି ॥
ଘାସ ଗାଲିଚାରେ ସାଧବବୋହୁଯେ
ନାଲି ଟୁକୁଟୁକୁ ଦେହେ,
ଥିରିଥିରି ପାଦେ ବରଷାଋତୁର
ଶୋଭାକୁ ବଢ଼ାଉଥାଏ ॥
ରଜ ନୂଆଖାଇ ଯେ ଗହ୍ମା ପୁନେଇଁ
ଘରେ ଘରେ ପୂଜା ମଜା,
ଗୁଣ୍ଡିଚା ରଥରେ କାଳିଆ ରଜା ଲୋ
ବାଜୁଥାଏ କେତେ ବାଜା ॥
ବରଷା ଆସିଲେ ଚଷା ଭାଇ ଗାଏ
ମନମତାଣିଆ ଗୀତ,
ସାରୁ ଗଛ ମୂଳେ ବେଙ୍ଗୁଲିରାଣୀତ
ପତର ଟି ତା'ର ଛାତ ॥
ତୁମେ ଯେ ବରଷା ସକଳ ଭରସା
ବନ୍ଧୁ ଜୀବଜଗତର,
କରୁଣା ପ୍ରକାଶି ସଭିଙ୍କୁ ଉଶ୍ୱାସି
ବାରି ଦିଅ ନିରନ୍ତର ॥
ଉତ୍ତରା ଶାସନ, କୌଶଲ୍ୟାଗଙ୍ଗ, ପିପିଲି, ପୁରୀ
VOL.IX, ISSUE.VII, JULY-2025
Published By Banamallira Mahak
ପ୍ରକାଶିତ ଲେଖାଟି ଯଦି ପଢି ସାରିଛନ୍ତି, ଆପଣଙ୍କ ପ୍ରତିକ୍ରିୟା ଏଠାରେ ନିଶ୍ଚୟ ରଖନ୍ତୁ ।