ପରିବା କିଣିବ ବୋଲି,
ହଇକିଏ ବାବୁ ନବ କି ନ ନବ
କହି ଦଉନାହଁ ଖୋଲି !!
ଜାଣିଛ ତ ତୁମେ ସଂସାର ଚଳଣି
ସବୁ ଦରଦାମ ଚଢ଼ା,
ତୋଳି କରି ସଜ ପରିବା ଆଣିଛି
ନାହିଁ ଜମା ପଚା ସଢ଼ା ॥
ତିରିଲା ସହିତ ଭୋକ ଶୋଷ ଭୁଲି
ମାଟି ସଙ୍ଗେ ହେଲି ମାଟି,
ହଳ କରି ଘାସ ବାଛି କୋଡ଼ି ଖୋସି
ପାଣି ଦେଲି ପୁଣି ଛାଟି ॥
କେତେଦିନ ପରେ ପରିବା ଫଳିଲା
ଉସତ ହୋଇଲା ମନ,
ନ ଖାଇ ହାଟକୁ ନେଇ ଆସିଅଛି
ପାଇବାକୁ କିଛି ଧନ ॥
ହାକିମ ଭଳିଆ ଦିଶୁଅଛ ତୁମେ
ମୂଲଚାଲ କିଆଁ କର,
ଏଇ କିଛି ଟଙ୍କା ଅଧିକ ଦେଲେ କି
ହୋଇବ ଗରିବ ନର ॥
ସେଇ ପଇସାରେ ଭଲ ଚିଜ କିଛି
ନେବି ମୋ ପିଲାଙ୍କ ପାଇଁ,
ସଅଳ ଏତକ ବିକିଦେଲେ ସିନା
ଯିବି ତାଙ୍କ ପାଶେ ଧାଇଁ ॥
ପରିଶ୍ରମ କଥା ହେଜ କରି ମୋର
ଦିଅ ଯା' ପାଉଣା ଦେବ,
ଠାକୁରେ ଚାହିଁଲେ ଆର ବରଷକୁ
ଆହୁରି ପରିବା ହେବ ॥
ମାମୁରିଆ, ଛେଣ୍ଡିପଦା, ଅନୁଗୋଳ
