କହ୍ନେଇ ମଥାରେ ମୟୂର ଚନ୍ଦ୍ରିକା
ସାତ ରଙ୍ଗେ ରଙ୍ଗାୟିତ
କଳା ମେଘ ଦେହେ ଇନ୍ଦ୍ରଧନୁ ଶୋହେ
ସାତ ରଙ୍ଗ ଚାରୁଚିତ୍ର ।
ଅଜଣା ଶିଳ୍ପୀର ତୂଳୀରେ ଅଙ୍କିତ
କମନୀୟ ରୂପ କାନ୍ତି
କବି ଭାବୁକର ଚିନ୍ତା ଚେତନାର
ରଙ୍ଗୀନ୍ ପରଜାପତି ।
ସାତଟି ରଙ୍ଗର ମଧୁର ସଂଯୋଗ
ସରଜେ ଧନୁର ଭ୍ରମ
ମାଟିରୁ ଆକାଶ ସୁନ୍ଦର ସୁବେଶ
ମଞ୍ଜୁଳ ମନୋରମ ।
ସାତସୁରେ ବନ୍ଧା ମଣିଷ ଜୀବନ
ସପ୍ତାହକ ସାତ ବାର
ସମୟ ସହିତ ରଙ୍ଗର ସଂଯୋଗ
ଇନ୍ଦ୍ରଧନୁ ଚମତ୍କାର ।
ସାତ ରଙ୍ଗ ତା'ର ସାତ କଥା କହେ
ଜୀବନ ଜୀବିକା ପାଇଁ
ଆମେ ତ ମଣିଷ ବାଣ୍ଟିବା ହରଷ
ଆତ୍ମ ପର ଭୁଲିଯାଇ ।
ଅନ୍ତର୍ମୁଖୀ ଚିନ୍ତା ବାଇଗଣୀ ରଙ୍ଗ
ଘନନୀଳ ଶ୍ରଦ୍ଧା ଭକ୍ତି
ତ୍ୟାଗର ମହତ୍ତ୍ଵ ନୀଳରେ ସୂଚିତ
ସବୁଜ ଜଗାଏ ଶାନ୍ତି ।
ହଳଦିଆ ରଙ୍ଗ ଖୁସି ଆନନ୍ଦର
ସାହସ ପ୍ରତୀକ ଲାଲ୍
ନାରଙ୍ଗୀ କହୁଛି ମମତାର କଥା
ସଂସାରର ହାଲଚାଲ୍ ।
ବରଷା ସହିତ ତୁମ ଆଗମନ
ଖୁସିର ସନ୍ଦେଶ ନେଇ
ବରଷା ଝରିବ ଉତ୍ତାପ କମିବ
ସବୁଜ ଦିଶିବ ମହୀ ।
ଧନ୍ୟ ତୁମେ ଇନ୍ଦ୍ରଧନୁ
ଯିଏ ବି ଦେଖିବ ଘଡିଏ ଚାହିଁବ
ପାସୋରି ଯିବନି ମନୁ ।
ପଞ୍ଚାୟତ ସରକାରୀ ଉଚ୍ଚ ବିଦ୍ୟାଳୟ
ପଡ଼ିଆଭଙ୍ଗା, ତାଳଚେର, ଅନୁଗୋଳ
ଦୂରଭାଷ - ୯୫୫୬୯୮୯୭୨୩
VOL.IX, ISSUE.VI, JUNE-2025
Published By Banamallira Mahak
ପ୍ରକାଶିତ ଲେଖାଟି ଯଦି ପଢି ସାରିଛନ୍ତି, ଆପଣଙ୍କ ପ୍ରତିକ୍ରିୟା ଏଠାରେ ନିଶ୍ଚୟ ରଖନ୍ତୁ ।