ଖୁସିର ଜୀବନ ବଞ୍ଚିବାକୁ ହେଲେ
ଦୁଃଖକୁ କର ସହନ,
ଦୁଃଖକୁ ସୁଖରେ ବଦଳାଇ ଶିଖ
ସୁଖରେ କଟିବ ଦିନ ।
ଦୁଃଖ ସହଚର ଭାବର ଝଙ୍କାର
ଆପେ ଆପେ ଆସେ ମାଡ଼ି,
ପୂତ ପ୍ରେମ ସୂର୍ଯ୍ୟ ଉଦୁଥାଉ ପ୍ରାଣେ
ଦୁଃଖ ଭାବ ମନେ ଛାଡ଼ି ।
ମନ ଇଚ୍ଛା ପର ବିକ୍ଷିପ୍ତ ନ କରି
କର୍ମେ ଧ୍ୟାନ ଦେଲେ ହର୍ଷେ,
ଜୀବନର କାଳ ସୁଖେ ବିତିଯାଏ
ସୂର୍ଯ୍ୟାସ୍ତ ପରି ଆକାଶେ ।
ହିଂସା ଅହଙ୍କାର ବିଷର ଭଣ୍ଡାର
ଶରୀରେ ବେଦନା ଭରେ,
ସୁଖର ଆକାଶେ ଦୁଃଖର ବଉଦ
ଅକାଳ ବିଜୁଳି ମାରେ ।
ଲୋଭ ମୋହ ମାୟା ଅଦୃଶ୍ୟର ସଜା
କାୟାର ବିଶାଳ ଛାୟା,
ପ୍ରାଣର ଉହାଡେ ରହିଥାଏ ଲୁଚି
ମାନବକୁ କରେ ବାୟା ।
କ୍ରୋଧ ପ୍ରତିରୋଧ ହରେ ଶକ୍ତି ବୋଧ
କାମନା ବାସନା ରହି,
କରମ ଗତିରେ ବାଧା ସୃଷ୍ଟି କରେ
ଦୁଃଖର ବିଡାକୁ ସହି ।
ଦୟା କ୍ଷମା ଗୁଣ ଧୈର୍ଯ୍ୟ ଓ ସହନ
ଯା ମନେ ରହିଛି ଭରି,
ସେ ଜନ ମହାନ ଦେବତା ସମାନ
ଯିବା ତାଙ୍କ ଅନୁସରି ।
ମାନେଶ୍ଵର, ସମ୍ବଲପୁର, ଓଡିଶା
VOL.IX, ISSUE.VII, JULY-2025
Published By Banamallira Mahak
ପ୍ରକାଶିତ ଲେଖାଟି ଯଦି ପଢି ସାରିଛନ୍ତି, ଆପଣଙ୍କ ପ୍ରତିକ୍ରିୟା ଏଠାରେ ନିଶ୍ଚୟ ରଖନ୍ତୁ ।