ସେଥିପାଇଁ ତ ତୁମେ ମାନବ - ନାରାୟଣ ଚନ୍ଦ୍ର ସେନାପତି

ସେଥିପାଇଁ ତ ତୁମେ ମାନବ - ନାରାୟଣ ଚନ୍ଦ୍ର ସେନାପତି

ତୁମେ ତ ସ୍ରଷ୍ଟାଙ୍କ ସୃଷ୍ଟିରେ ଦିବ୍ୟ ପ୍ରତିଭା
ସୁଷମା ମଣ୍ଡିତ ନବ କଳେବର
ତୁମେ ଧର୍ମ ତୁମେ ପୁଣ୍ୟ
ତୁମେ ହିଁ ସତ୍ୟ ଅନୁସନ୍ଧିତ୍ସୁ
ଭବିଷ୍ୟ ବିଶ୍ୱ ନିୟନ୍ତା ବି ତୁମେ
ସେଥିପାଇଁ ତ ତୁମେ ମାନବ।

ତୁମେ ତ ସ୍ନେହ ପଞ୍ଜୁରୀର ମମତା ପକ୍ଷୀ
ଶ୍ରଦ୍ଧା ଖଚିତ ଆଲୋକ ବର୍ତ୍ତିକା
ତୁମେ ଐକ୍ୟ ତୁମେ ପ୍ରେମ
ତୁମେ ହିଁ ଆଶା ପାହାଡ଼ର ଭରସା ଶୃଙ୍ଗ
ଆକାଂକ୍ଷା ମହଲର ଅଭୀପ୍ସା ତାଜ ବି ତୁମେ
ସେଥିପାଇଁ ତ ତୁମେ ମାନବ।

ତୁମେ ତ ଅହିଂସ ଉଦ୍ୟାନର ନିଷ୍ପାପ କଳିକା
ଛନ୍ଦ କପଟ ଶୁନ୍ୟ ଅମ୍ଳାନ ମର୍ଯ୍ୟାଦା
ତୁମେ ତ୍ୟାଗ ତୁମେ ନିଷ୍ଠା
ତୁମେ ହିଁ ଆତ୍ମୀୟତାର ପ୍ରୀତି ବୀଜପତ୍ର
ପରୋପକାରୀ ନିଃସ୍ୱାର୍ଥପର ସେବକ ବି ତୁମେ
ସେଥିପାଇଁ ତ ତୁମେ ମାନବ।

ନାରାୟଣ ଚନ୍ଦ୍ର ସେନାପତି, ଜମ୍ଭରା, କେନ୍ଦୁଝର

0 Comments