ରଜମଉଜ - ଶିବ ଚରଣ ମହାପାତ୍ର

ରଜମଉଜ - ଶିବ ଚରଣ ମହାପାତ୍ର

ଆଷାଢ ପ୍ରଥମା ତିଥିରେ ଆଜି
ଆସିଛି ରଜ
ପୁରପଲ୍ଲୀ ଗାଆଁ ସହର ସର୍ବେ
ହୁଅନ୍ତି ସଜ..

ସଙ୍ଖ ହୁଳହୁଳି ସଙ୍ଗତେ ଉଇଁ
ପ୍ରଭାତ ରବି
ମଖମଲ୍ ଚାଦର ଢାଙ୍କି କିବା
(କିଏ)ଆଙ୍କୁଛି ଛବି..

ନବ ବସ୍ତ୍ର ରଙ୍ଗ ମାଖିଣ ଲାଜେ
ହସୁଛି ଧରା
ଝିଅ ବୋହୂ ପାଦେ ଅଳତା ସତେ
ଅନ୍ତିମ ଖରା..

ମିଠା ମିଠା ପୋଡ ପିଠା ବାସନା
ସବୁଠି ବାସେ
ଭିନ୍ନା ଭିନ୍ନ ମଧୂ ବ୍ୟଞ୍ଜନ ଥୁଆ
ପିରତି ରସେ..

ମନେ ଭରି ନୂଆ ଆଶା ଉମଙ୍ଗ
ଖେଳନ୍ତି ଦୋଳି
ଆନନ୍ଦ ଉଲ୍ଲାସ ସବୁରି ହୃଦେ
ପଡୁଛି ଝୁଲି..

ନାଲି ଶାଢୀ ସଙ୍ଗେ ନାଲି ଓଠ ଟି
ଚମକେ ଭାରି
ଦୋଳି ଗୀତ ଗାଇ ହୃଦୟ କିଣେ
ଗାଆଁ ସୁନ୍ଦରୀ..

କେଏଁ କଟର ର ଦୋଳି ଶବଦ
ଭାରି ମଧୂର
ଖିଲି ପାନ ମିଠା ମହକ ଟାଣେ
ପାଖକୁ ତାର..

ଲୁଚକାଳି ପୁଚି କବାଡି ତାସ୍
ଖେଳ ରେ ମାତି
ପିଲା ଛୁଆ ବୃଦ୍ଧ ସର୍ବେ ଭୁଲନ୍ତି
କି ଦିନ ରାତି..

ପ୍ରକମ୍ପିତ ଗୀତ ଧରଣୀ କୋଣେ
ଖେଳେ ଲହରୀ
ଗୀତ ତାଳେ ମେଘ ବଉଦ ଢାଳେ
ସେନେହ ବାରି..

ମାଟି ବରଷା ର ମିଳନ ପର୍ବ
ରଜମଉଜ
ଓଡିଆ ଜାତିର ଐତିହ୍ୟ ମନେ
ଉଡାଏ ଧ୍ୱଜ..

ଆମ୍ବ ତୋଟା ଛାଇ ଆସର ତଳ
ଥାଉ ଏ ପ୍ରିତି
ଜୀବନ ର ଦୋଳି ଖେଳୁ ଉଲ୍ଲାସେ
ପୁରାଇ ଛାତି..

ଶିବ ଚରଣ ମହାପାତ୍ର
ଚକ୍ରଧରପୁର, କେନ୍ଦୁଝର

0 Comments