OUR READERS STATUS AROUND THE GLOBE : INDIA-369114 CANADA-450 CHINA-889 FRANCE-2506 GERMANY- 2255 QATAR - 61 SINGAPORE - 1114 UNITED STATES - 15666 UNITED KINGDOM - 602 UNITED ARAB EMIRATES - 934 UKRAINE-47 UNKNOWN REGIONS-5943 (As On 31st May 2019)

ଆଶା ଏକ ଅମାନିଆ ନଈ - ହାସ୍ୟମୟୀ ରାଜ୍

ଆଶା ଏକ ଅମାନିଆ ନଈ - ହାସ୍ୟମୟୀ ରାଜ୍

ନାସ୍ତିକ କେବେ ଦେଇପାରିବକି
                     ଦେବତାର ପରିଭାଷା
ଧର୍ମାନ୍ଧ କେବେ ଭରିପାରିବକି
                  କାହାର ମନରେ ଆଶା ।
ବନ୍ଧ୍ୟା ମାଟିରେ ହସି ପାରିବକି
                        ପୁର୍ଣ୍ଣତାର ଫୁଲକଷି
ପଳାଶ ଫୁଲଟା ଦେଇ ପାରିବକି
                      ବାସନାକୁ ହସି ହସି ।
କୁହୁଡିଟା କେବେ ହେଇ ପାରିବକି
                       ସାଗର ଉଛୁଳା ଛାତି
ଅମାବାସ୍ୟାଟା ଭେଟି ପାରିବକି
                       ତୋଫା ଜହ୍ନର ରାତି ।
ମରୁର ଭୂଇଁରେ ଶୁଣି ପାରିବକି
                        ଝରଣାର କୂଳୁ ଗୀତି
ନିଷ୍ଠୁର ମଧ୍ୟାହ୍ନ ଦେଇ ପାରିବକି
                      ସକାଳର ମିଠା ପ୍ରୀତି ।
ଶୂନ୍ଯ କ୍ଷେତରେ ହସି ପାରିବକି
                     କାହା କମନୀୟ କାନ୍ତି
ଶୁଷ୍କ ନଈଟା ଆଣି ପାରିବକି
                    ଅମାପ ତୃଷ୍ଣାରେ ତୃପ୍ତି  ।
ଉଷର ଭୂଇଁଟା ଆଙ୍କି ପାରିବକି
                        ଶସ୍ଯର କଳାକୃତି
ବଢିଲା ନଈକୁ ଦେଖିଛକି ବନ୍ଧୁ
                 କେମିତି ଖେଳାଏ ଭୀତି ।
ଥୁଣ୍ଟା ଗଛଟା ଶୁଣି ପାରିବକି
                    କୋକିଳର କୁହୁ ଗୀତି
ଶୁଷ୍କ ଅମାର ଭରିପାରିବକି
                   ଭୋକର ଅସହ୍ୟ ତାତି।
ଶୂନ୍ଯ ହୃଦୟ ଦେଇ ପାରିବକି
                    ଆଶ୍ବାସନା ସିକ୍ତ ବାଆ
ତିକ୍ତ ମନଟା ଭରିପାରିବକି
                    ଆଶାର କିରଣ ନୂଆ ।
ତଥାପି ମନଟା ବୁଝେନାହିଁ ଜମା
                  ଅପେକ୍ଷାରେ ବିତେ ଦିନ
କିଏ ଆସି ଦିନେ ଫୁଙ୍କିଦେବ କାନେ
                     ମଧୁର ବଈଂଶି ସ୍ବନ  ।
ଭଙ୍ଗା ବୀଣାରେ ତୋଳିଦେବ ସୁର
                    କଷଣକୁ କରି ସାକ୍ଷୀ
ଜୀବନ ସ୍ବପ୍ନ ଭାଙ୍ଗିଯିବା ବେଳେ
                  ସାହା ଏକା ପ୍ରିୟ ସାଥୀ ।
ନିଦାଘ ଦେଲାଣି ଅସହ୍ୟ ଜାତନା
                          ଧୂ ଧୂ ଖରା ନିଆଁ
ବରଷାତ ଦିନେ ଭିଜେଇବ ତାକୁ
                    ଭରିବ ଶୀତଳ ଛୁଆଁ ।
ଅଳିକ ଜୀବନ ଅସରନ୍ତି ଶୋଷ
                   କାମନାର ଶେଷ ନାହିଁ
ବୁଝିବି ବୁଝେନା ଆଶାରେ ଦଉଡେ
                    ଅମାନିଆ ମନ ଏଇ ।।

Writer's Details: ହାସ୍ୟମୟୀ ରାଜ୍
ଓରାଳି, ହାଟଡିହି କେନ୍ଦୁଝର ।
Content Category:
Submission Date: May 26, 2019

0 Comments