"ବଣମଲ୍ଲୀର ମହକ ଗଳ୍ପ ପ୍ରତିଯୋଗିତା" ଏବଂ "କବିର ଘର କବିତା ପ୍ରତିଯୋଗିତା" ରେ ନିଜକୁ ସାମିଲ କରନ୍ତୁ । ଅନଲାଇନ ମାଧ୍ୟମରେ ଏହି ପ୍ରତିଯୋଗିତା ଗୁଡିକରେ ଅଂଶଗ୍ରହଣ କରିବା ନିମନ୍ତେ ୱେବ-ପୋର୍ଟାଲରେ ଉପଲବ୍ଧ ଥିବା LITERACY CONTEST ଫଳକକୁ କ୍ଲିକ କରି ଆଗକୁ ବଢନ୍ତୁ ।

ସୁଟ୍ ଜାପାନୀ - ଶିବ ଚରଣ ମହାପାତ୍ର

ସୁଟ୍ ଜାପାନୀ - ଶିବ ଚରଣ ମହାପାତ୍ର

ପର ଘର ତୁଣ ଭାରି ସୁଆଦ ଲୋ
ନିଜ ଘରେ ପିତା ପାଣି
ପର ମାଇପ ଟା ଚହଟ ଚିକ୍କଣ
ନିଜ ଭାରିଜା ଟା କାଣି ..
ପର ପୁରୁଷ ଟା ରତିକ ରୋଶନ
ଘର ପତି ଜାଣେନାହିଁ
ପର ଚାଳେ ଝୁଲେ ଗୁଡ ମାଠିଆ କୁ
ତୁମେ କାଇଁ ହାଇଁ ପାଁଇ..
ନିଜ ପୁଅ ଭାରି ସୁଧାର ପିଲାଟା
ପର ପୁଅ ଅଝଟିଆ
ନିଜ ଝିଅ ଭାରି ସରଳ ସଂସ୍କାରି
ପର ଝିଅ ବାଡ ଡିଆଁ..
ସାହେବ ର ସ୍ତ୍ରୀ ଅନିନ୍ଦ୍ଯ ସୁନ୍ଦରୀ
ତାଙ୍କ ପିଲା ଦେବଦୂତ
ନିଜ ଘର ସ୍ତ୍ରୀ ଛୁଆ ପିଲା ସବୁ
ଲାଗନ୍ତି ବାବନା ଭୂତ..
ଧୋତି କୁରୁତା ରେ ଟୋକା ଲାଗେ ବୁଢା
ସୁଉଟୁ ସାର୍ଟ ଆଦର
ଶାଢୀ ପିନ୍ଧିଦେଲେ ଝାଳ ବହେ ବୋଲି
ଭାଉଜ ପିନ୍ଧେ ସାଲୁଆର..
ନିଜ ପରମ୍ପରା ହଡା ଗାଇ ଭାବି
ପାଦରେ ଆଡେଇ ଯାଅ
ପାଶ୍ଚାତ୍ୟ ସଂସ୍କୃତି ଅତର ମାଖିଛି
ଆଗେପଛେ ଘୁରୁଥାଅ..
ନିଜ ଘର ଭାଷା ଭାରି ଅଖାଡୁଅ
ବିଦେଶୀ ଭାଷା ଟା ଭଲ
ଘଣା ପେଡା ଯେତେ ଦେହକୁ କୁଣ୍ଡାଏ
ପସନ୍ଦ ଜାପାନ ତେଲ..
ଦୂର ପରବତ ଭାରି ସୁନ୍ଦର ତ
ଭିତରେ ଯନ୍ତ୍ରଣା ଭରା
ନିଜ ଚାଳ ଛାଡି ପର ଘରେ ଗଲେ
ଦେଖିବ ଦିନରେ ତାରା..
ବେଳ ଥାଉଁ କୁଳ ବାଇନ ସମ୍ଭାଳ
ଉଛୁର କରନା ବେଶି
ନିଜ ଜିନିଷ ଟା ଅସଲି ରେ ଧନ
ପରଖି ନେ ମାଞ୍ଜି ଘଷି...

×-×-×-×-×-×-×-×-×-×
ଶିବ ଚରଣ ମହାପାତ୍ର
ଚକ୍ରଧରପୁର : କେନ୍ଦୁଝର

0 Comments