ବାତ୍ୟା ଜନିତ ଅସୁବିଧା କାରଣରୁ କ୍ଷୁଦ୍ରଗଳ୍ପ ଓ କବିତା ପ୍ରତିଯୋଗିତାର ଫଳାଫଳ ମେ - ୧୦ ତାରିଖ ପରିବର୍ତ୍ତେ ଚଳିତ ମାସ ୩୧ ତାରିଖ ସୁଧା ଘୋଷଣା କରାଯିବ । ଏବଂ ଚଳିତ ମାସ ୨୩ ତାରିଖ ଠାରୁ କବିର ଘର ପ୍ରସ୍ତୁତ "ଆଜିର ଅତିଥି" କାର୍ଯ୍ୟକ୍ରମର ସାପ୍ତାହିକ ପ୍ରସାରଣ ସେବା ଆରମ୍ଭ ହେବ । ଅନିଚ୍ଛାକୃତ ଅସୁବିଧା ନିମନ୍ତେ ଦୁଃଖିତ ।

ପଢିବାର ଅଛି - ଶିବ ଚରଣ ମହାପାତ୍ର

ପଢିବାର ଅଛି - ଶିବ ଚରଣ ମହାପାତ୍ର



ପଢିବାର ଅଛି ଅନେକ କିଛି...
ବିଦୀର୍ଣ୍ଣ ପୃଥିବୀ ର ରାସାୟନିକ ମନ
ମନ ତଳ ଗୁପ୍ତ ଷଡଯନ୍ତ୍ର ର କାରଣ..
ଉଲଗ୍ନା ଜହ୍ନ ର ଚିହ୍ନ
ଚିହ୍ନ ତଳେ ଉତ୍କ୍ଷିପ୍ତ ମନ୍ତ୍ର ମାନଙ୍କର
ସମାହିତ ନୀତି ନିୟମ
ଉଚାଚିତ ରାଣ..
ପଢିବାର ଅଛି..

ପଢିବାର ଅଛି..
ତାତ୍ତ୍ବିକ ତାଳପତ୍ର ରେ
ଇଛା ଧାରୀ ଶ୍ଳୋକ ମାନଙ୍କ ଦ୍ଵାରା
ଫୋଡି ହେଇଯାଉଥିବା ସମାଜ
ସମାଜ ତଳ ର ଚକ୍ରବ୍ୟୁହ..
ସମସ୍କନ୍ଧ ହେଇ ଚାଲୁଥିବା
ପୋଥି-ପୁରାଣ-ଗୀତା-ବାଇବେଲ-
କୋରାନ ମାନଙ୍କର
ଆଶା ଆକାଙ୍କ୍ଷା ଆଉ
ଶିଶିର ଭିଜା ମୋହ..
ପଢିବାର ଅଛି..

ପଢିବାର ଅଛି..
ଲାଲ୍ ଟହଟହ ସୂର୍ଯ୍ୟ ର ପିଠି
ସେ ପିଠି
ମନ୍ଦାର  ଫୁଲ ର ନା କୃଷ୍ଣଚୂଡା ର
ବ୍ୟର୍ଥ ମନୋରଥ କାମନା ରଙ୍ଗ...
ପ୍ରଜାପତି ଡେଣା ପିନ୍ଧା ଆଖି ମାନେ
ଟୁକ୍ ଟୁକ୍ ଚାହିଁ
ଶିରଛେଦ କରି
ବାରମ୍ବାର କାଇଁ ବଦଳାନ୍ତି ଦିଗ..
ପଢିବାର ଅଛି..

ପଢିବାର ଅଛି..
ତତଲା ଦେହର ମାଟିରେ
ଭୂଗୋଳ ଆଙ୍କିବା ର ସୁଖ
ଅବଚେତନ ସାଗର ର ନୀରବତା..
କିଆ ଗହୀରି ର ବିସ୍ତୀର୍ଣ୍ଣ ହୃଦୟରେ
ସାଧବ ବୋହୂ ର
ଭିଜା ଭିଜା କେତେ କଥା..
ପଢିବାର ଅଛି..

ପଢିବାର ଅଛି..
ଗ୍ରନ୍ଥ ଛାତିରେ ଲିପିବଦ୍ଧ
ଅସହିଷ୍ଣୁ କାହାଣୀ ର ବାହାର ଦୁନିଆ..
ମିଆଦ ବିହୀନ ଜୀବନ ରେ
ବେଲଗାମ ଜଳୁଛି
ଯେବେ ଭୋକିଲା ନିଆଁ..
ଖୁବ୍ ଶୀଘ୍ର ପଢିବାର ଅଛି..
ବାକି ବୟସରେ ଆହୁରି ଅନେକ କିଛି..

ଶିବ ଚରଣ ମହାପାତ୍ର
ଚକ୍ରଧରପୁର, କେନ୍ଦୁଝର

0 Comments