ଅଶାନ୍ତ ଅବଶୋଷ - ସିଦ୍ଧେଶ୍ଵର ତ୍ରିପାଠୀ

ଅଶାନ୍ତ ଅବଶୋଷ - ସିଦ୍ଧେଶ୍ଵର ତ୍ରିପାଠୀ


ଫେରିଯାଅ ତୁମେ ଫୁଲେଇ ଫଗୁଣ
ତୁମକୁ ଭରଷା ନାହିଁ
ଲୁହ ନଈରେ ମୁଁ ନିତି ଭିଜେ ଏଠି
କେବଳ ତୁମରି ପାଇଁ ।

ଏଇମିତି ତୁମେ କେତେ ରଙ୍ଗ ମାଖି
ଆସିଥିଲ ଅତୀତରେ
ସାରା ଜୀବନକୁ ଅବଶୋଷ ହୋଇ
ରହିଗଲ ଜୀବନରେ ।

ତୁମ ସାଥେ ବନ୍ଧା ଆଉକା ଜୀବନ
ହସି ହସାଇବା ପାଇଁ
ଫେରିଯାଅ ତୁମେ ଫୁଲେଇ ଫଗୁଣ
ତୁମକୁ ଭରଷା ନାହିଁ ।

ତୁମରି ଦେହର ବଉଳର ବାସ
ମିଠା ହସ ଓଠ ଧାରେ
ମନ ଯଉବନ ମୋତେ ପରସିଲେ
ପଡିଯିବି ନରକରେ ।

ଯେଉଁ ତିନି ଗାର କାଟିତ ଦେଇଛ
ତାକୁ ପାରିବିନି ଡେଇଁ
ଫେରିଯାଅ ତୁମେ ଫୁଲେଇ ଫଗୁଣ
ତୁମକୁ ଭରଷା ନାହିଁ ।

ସିଦ୍ଧେଶ୍ଵର ତ୍ରିପାଠୀ
କୁଣ୍ଡିଲୋ, କେରଙ୍ଗ, ଖୋରଧା

0 Comments