Information

ମନପୀଡ଼ା ମୋର ହୋଇବ ଊଣା - ବି. ନିରୁପମା


ମନମୋହନଙ୍କ ଦରଶନ ଲାଗି
ବ୍ୟାକୁଳିତ ହୁଏ ସଦା ମୋ ପ୍ରାଣ,
ମୁହଁ ଖୋଲି ଏହା କା' ଆଗେ କହିବି
କେ ଅବା କରିବ ମୋର କଲ୍ୟାଣ !

ଯେତେ ତୀର୍ଥ-ଦେବାଳୟ,ଗିରି-ବନ
ପାହାଡ଼,ଝରଣା ସବୁଠି ସତ୍ତା ,
ପୂରିଅଛି ସିନା ଆକାଶେ-ପବନେ
କେଉଁଠାରେ କିନ୍ତୁ ପାଉନି ପତ୍ତା ।

କେମିତି ଭଜିବି, କି ମନ୍ତ୍ରେ ପୂଜିବି
ମାର୍ଗ ଦେଖାଅ କେ ବହି କରୁଣା ,
ସେ ପ୍ରିୟତମଙ୍କ ସାକ୍ଷାତ ଲଭିବି
ମନପୀଡ଼ା ମୋର ହୋଇବ ଊଣା ।

ଅନ୍ତର୍ଯ୍ୟାମୀ ହୋଇ,ଅନ୍ତରରେ ଥାଇ
 ବୁଝି ପାରନ୍ତିନି କେମିତି ବ୍ୟଥା,
କା' ଆଗେ କହିଲେ ବିଶ୍ୱାସ କରିବ
ତାଙ୍କ ସଙ୍ଗେ ଭାବ ଯୋଡ଼ିବା କଥା ।

ମୋ ମାନସ ପଟେ ଉଙ୍କିମାରେ ସଦା
ତାଙ୍କର ସେ ମନମୋହନ ଛବି,
ଏ ପିଣ୍ଡରେ ପ୍ରାଣ ଥାଉଁ ଥାଉଁ ସତେ
ଥରୁଟିଏ ତାଙ୍କ ଦେଖା ପାଇବି !

ବି. ନିରୁପମା
ମାମୁରିଆ, ଛେଣ୍ଡିପଦା, ଅନୁଗୋଳ

Post a Comment