ବାତ୍ୟା ଜନିତ ଅସୁବିଧା କାରଣରୁ କ୍ଷୁଦ୍ରଗଳ୍ପ ଓ କବିତା ପ୍ରତିଯୋଗିତାର ଫଳାଫଳ ମେ - ୧୦ ତାରିଖ ପରିବର୍ତ୍ତେ ଚଳିତ ମାସ ୩୧ ତାରିଖ ସୁଧା ଘୋଷଣା କରାଯିବ । ଏବଂ ଚଳିତ ମାସ ୨୩ ତାରିଖ ଠାରୁ କବିର ଘର ପ୍ରସ୍ତୁତ "ଆଜିର ଅତିଥି" କାର୍ଯ୍ୟକ୍ରମର ସାପ୍ତାହିକ ପ୍ରସାରଣ ସେବା ଆରମ୍ଭ ହେବ । ଅନିଚ୍ଛାକୃତ ଅସୁବିଧା ନିମନ୍ତେ ଦୁଃଖିତ ।

ଶିଶୁ କବିତା - ଦେ ମା' ଆଶିଷ ହେ ବାଗ୍ଦେବୀ - ନାରାୟଣ ଚନ୍ଦ୍ର ସେନାପତି

ଶିଶୁ କବିତା - ଦେ ମା' ଆଶିଷ ହେ ବାଗ୍ଦେବୀ - ନାରାୟଣ ଚନ୍ଦ୍ର ସେନାପତି


ତୋର ଶ୍ରୀପଦରୁ ଧୂଳି ଟିକେ ଦେ ମା'
                  ସେ ଧୂଳି ମୁଣ୍ଡରେ ମାରି
ପବିତ୍ର କରିବି ଆତ୍ମା  ହେ ବାଗ୍ଦେବୀ
                 ବାହିବି ଜୀବନ ତରୀ॥
ତୋ ଶୁଭ୍ର ବସ୍ତ୍ରରୁ ଅବା ହଂସ ପରୁ
                   ଧବଳ ରଙ୍ଗକୁ ବୋଳି
ପରିବେଶ ମନ ନିର୍ମଳ କରିବି
                   ସ୍ୱଚ୍ଛତା ପତାକା ଧରି॥
ତୋ ବୀଣା ସ୍ୱନରୁ ସ୍ୱର ଖଞ୍ଜିଦେ ମା'
                    ସେ ସ୍ୱର କଣ୍ଠରେ ଧରି
ରୋଗୀ ଦୁଃଖି ଶୋକି ହୃଦୟେ ଭରିବି
                    ମଳୟ ଚନ୍ଦନ ପରି॥
ତୋ ବେଦ ଶାସ୍ତ୍ରରୁ ଓଁ କାର ଦିଅ ମା
                   ଆନନ୍ଦରେ ଗାଇ ଗାଇ
ଜ୍ଞାନ ଗଙ୍ଗା ଢାଳି ସଂସାର ଅଜ୍ଞାନ
                   ତମସା ଦେବି ଦୂରେଇ॥
ତୋ ବହି ପୃଷ୍ଠାରୁ ବିଦ୍ୟା ବୁଦ୍ଧି ଦେ ମା'
                  ସରାଗେ ଦେବି ମୁଁ ପଢି
ଅପୂର୍ବ ବିଦ୍ୟାକୁ ଜୀବନରେ ଧରି
                  ଜିଣିଯିବି ବିଦ୍ୟାପୁରୀ॥
ତୋ ଆଖିରୁ ଟିକେ କଜ୍ଜଳ ଦେ ମା'
                 ମୋ ଆଖିରେ ଦେବି ବୋଳି
ସେ କଳା ମୁଗୁନି କଳାରେ କୋଣାର୍କ
                    ଗଢିବି ମାରିବି ଚୁଳି॥
ତୋ କର୍ଣ୍ଣରୁ ରତ୍ନ କୁଣ୍ଡଳ ଦେ ମା'
                    ମୋ ଗଳାରେ ମୁକ୍ତାହାର ଦେ
ତା ଠାରୁ ତ ବଳି ତୋ ଶ୍ରଦ୍ଧା ଆଶିଷେ
                 ମୋ ସଂସାର ସରଗ କରିଦେ॥

ନାରାୟଣ ଚନ୍ଦ୍ର ସେନାପତି
ଜମ୍ଭରା, କେନ୍ଦୁଝର