Information

"ସ୍ଵାଗତିକା" ସାହିତ୍ୟ ପତ୍ରିକା ନିମନ୍ତେ ଇ-ମେଲ, ହ୍ଵାଟସଆପ ଓ ଡାକ ମାଧ୍ୟମରେ କବିତା ପଠାନ୍ତୁ । କବିତା ପଠାଇବାର ଶେଷ ତାରିଖ ୩୦/୧୧/୨୦୧୮ ଏବଂ କବିତାର ପରିଧି ୧୬ ରୁ ୨୦ ଧାଡି ମଧ୍ୟରେ ରହିବା ଆବଶ୍ୟକ । Email - swagatika.nishikanta@gmail.com / WhatsApp - 8018646704 / By Post - The Chief Editor, Swagatika, At - Lokipur, PO - Gadamanatir, Dist - Khordha, Pin-752062, Odisha.

ଦେବୀ ହୈମବତୀ - ପ୍ରଫୁଲ୍ଲ ଚନ୍ଦ୍ର ମିଶ୍ର

• ଶରତ ସକାଳ ଶେଫାଳୀ ଶେଜରେ ବାଳାର୍କ ଅରୁଣ କାନ୍ତି
• କାଶତଣ୍ଡି ଫୁଲ ଚାମର ଢାଳଇ ଆସୁଛନ୍ତି ମହାଦେବୀ ।
• ସରୋଜ ଶୋଭିତ ସରୋବର ଶୋଭା ଦିଶେ ବଡ଼ ମନୋହର
• କମଳ କୋମଳ ସଉରଭ ଭରି ବହଇ ମନ୍ଦ ଅନିଳ ।
• ସଙ୍ଗେ ଆସୁଛନ୍ତି ପଦ୍ମା, ସରସ୍ବତୀ ଶକ୍ତିଧର, ଦ୍ବୈମାତୁର
• ଦେବକୂଳ ବଳ- ବିର୍ଜେ ବିଭୂଷିତା ସଙ୍ଗେ ଶମ୍ଭୁ,ବିଶ୍ବମ୍ଭର ।।

• ମଙ୍ଗଳ ବାଜା ମଙ୍ଗଳ ସଙ୍ଗୀତେ ଧରାହୁଏ ମୁହ୍ୟମାନ
• ବେଦ ମନ୍ତ୍ର ଧ୍ବନି ଘୃତାହୁତି ଦେଇ କରୁଅଛୁ ଆବାହନ ।
• ଆକାଶେ ଭାସଇ ଶୁଭ୍ର ଅଭ୍ର ମେଘ କିଅବା ରୈପ୍ୟ ପର୍ବତ
• ବିଜୟ କରିବେ ଦେବୀ ହୈମବତୀ କରେ ସତେକି ସ୍ବାଗତ ।
• ଆସ ଆସ ଦେବୀ କଇଳାସ ତେଜି ଧରାରେ ବିଜୟ କର
• ବିକଳେ ସକଳେ ଡାକନ୍ତି ଆକୁଳେ ଧରା ହେଲାଣି ଅଥୟ ।।

• ଶ୍ରୀହୀନ ହେଲାଣି ମହିଷା ଇନ୍ଦ୍ରାରି କରୁଅଛି ଉତପାତ
• ଅନୀତି ଦୁର୍ନୀତି ଅପ ସଂସ୍କୃତି ର ବିସ୍ତାରି ଦେଇଛି ହାତ ।
• ଗ୍ରାମ କି ସହର ଦେଶ ବିଦେଶରେ ବିଛିନ୍ନତା ବାଦୀ ଦୈତ୍ୟ
• ମାଓ ହିଂସା ପ୍ରତି- ହିଂସା ଦାଵାନଳେ ଜଳି ଉଠଇ ମା' ମର୍ତ୍ତ୍ୟ ।
• ଜହର ଝରୁଛି ମଳୟ ପବନେ ,ନଦୀ ଜଳେ ଝରେ ବିଷ
• ଅବିଶ୍ବାସ ଭରା ଶୁକ୍ରଶିଷ୍ୟ ଦଳ କରୁଛନ୍ତି ସର୍ବନାଶ ।।

• ଆସ ଦେବଦେବୀ ଧରା ବିମଣ୍ଡିତ କର, କରି ଆଶିର୍ବାଦ
• ବରଦ ହସ୍ତ ତୋ ବିସ୍ତାରି ଦେ ମାତ କରି ତାରେ ପରାହତ ।
• ଝରିଯାଉ ପୁଣ୍ୟ ଆନନ୍ଦ ଲହରୀ ମହୀ ହେଉ ମହିୟାନ
• ପ୍ରିୟା ପ୍ରିତୀ ପ୍ରେମେ ମଧୁର ବନ୍ଧନେ ବିକସିତ ହେଉ ଜ୍ଞାନ ।
• ଏତିକି ମାଗୁଣି ତୋ ଅଭୟ ପଦେ ପ୍ରଫୁଲ୍ଲ ର ପୁଜା ଫୁଲ
• ଗ୍ରହଣେ ଧରାକୁ କରିଦେ ଜନନୀ ଯେସନେ ତ୍ରିଦଶାଳୟ ।

Post a Comment

0 Comments