ବାତ୍ୟା ଜନିତ ଅସୁବିଧା କାରଣରୁ କ୍ଷୁଦ୍ରଗଳ୍ପ ଓ କବିତା ପ୍ରତିଯୋଗିତାର ଫଳାଫଳ ମେ - ୧୦ ତାରିଖ ପରିବର୍ତ୍ତେ ଚଳିତ ମାସ ୩୧ ତାରିଖ ସୁଧା ଘୋଷଣା କରାଯିବ । ଏବଂ ଚଳିତ ମାସ ୨୩ ତାରିଖ ଠାରୁ କବିର ଘର ପ୍ରସ୍ତୁତ "ଆଜିର ଅତିଥି" କାର୍ଯ୍ୟକ୍ରମର ସାପ୍ତାହିକ ପ୍ରସାରଣ ସେବା ଆରମ୍ଭ ହେବ । ଅନିଚ୍ଛାକୃତ ଅସୁବିଧା ନିମନ୍ତେ ଦୁଃଖିତ ।

ମୋ ଗାଆଁ ମୋ ମାଆ - ଲକ୍ଷ୍ମୀନାରାୟଣ ପଟ୍ଟନାୟକ

ମୋ ଗାଆଁ ମୋ ମାଆ - ଲକ୍ଷ୍ମୀନାରାୟଣ ପଟ୍ଟନାୟକ


କେମିତି ଭୁଲିବି ମୋ ଗାଆଁ ମାଟିକୁ
ହୃଦୟଠୁ ପାଏ ଭଲ
ଏନ୍ତୁଡିଶାଳରେ ପ୍ରଥମ ପରଶ
କୋଳ ତା ଅମୂଲ ମୂଲ

ସେ ମାଟି କୋଳରେ ବଢିଅଛି ମୁହିଁ
ଅମୃତ ପରଶ ପାଇ
କେମିତି ଭୁଲିବି ମୋ ଜନମ ମାଟି
ଯେତେଦିନ ଥିବି ଜିଇଁ

ତା କୋଳରେ ବସି ଚାଟଶଳୀ ଘରେ
ଶିଖୁଥିଲି ବର୍ଣ୍ଣମାଳା
କେମିତି ଭୁଲିବି ମୋ ଗାଆଁର କୋଳ
ଅତୀତର ସେହି ବେଳା

କେତେ ଖେଳ କୁଦ ତା ଛାତି ଉପରେ
କେବେ ସେ କରିନି ରାଗ
କେମିତି ଭୁଲିବି ତା ଛାତି କଷ୍ଟକୁ
ସିଏ ମୋ ସବୁଠୁ ଆଗ

କେତେ ଜାନି ଯାତ୍ରା ମେଳା ମଉଛବ
କରେ ଆୟୋଜନ ସଦା
କେମିତି ଭୁଲିବି ତା ମନ କଥାକୁ
ସଦା କରୁଥିବି ଶ୍ରଦ୍ଧା

ଯେଉଁଠି ଥିଲେ ବି ସିଏ ମୋ ଜୀବନ
ହାତଠାରି ଡାକୁଥାଏ
କେମିତି ଭୁଲିବି ତା ସୁଖ ଦୁଃଖକୁ
ଜୀବନଟା ଥିବା ଯାଏ

ମୋ ନାମେ ଲେଖିଛି ତିନିହାତ ଜାଗା
ତା କୋଳେ ଶୋଇବା ପାଇଁ
କେମିତି ଭୁଲିବି ତା ପ୍ରେମ ମୂଲକୁ
ପବିତ୍ର ତାହାର ଭୁଇଁ

ଚିର ନିଦ୍ରା ଯିବି ତାହାରି କୋଳରେ
ପାଇବି ପରମ ଶାନ୍ତି
କେମିତି ଭୁଲିବି ମୋ ଗାଆଁ ମାଟିକୁ
ତା କୋଳେ ଲଭିବି ମୁକ୍ତି


ଲକ୍ଷ୍ମୀନାରାୟଣ ପଟ୍ଟନାୟକ
ମଙ୍ଗଳଯୋଡି, ଖୋରଧା
ଦୂରଭାଷ : ୯୮୬୧୬୧୬୧୨୬

0 Comments