Information

ଓଡିଆ ସାହିତ୍ୟ ଓ ସଂସ୍କୃତିର ନିଆରା ସ୍ଵର... ତିନିଶହରୁ ଉର୍ଦ୍ଧ ଲେଖକ ଲେଖିକା ଏବଂ ଦୁଇଲକ୍ଷରୁ ଉର୍ଦ୍ଧ ପାଠକ ପାଠିକା ମାନଙ୍କର ପ୍ରିୟ ଇ-ସାହିତ୍ୟ ପୋର୍ଟାଲ ବଣମଲ୍ଲୀର ମହକ ଆପଣଙ୍କୁ ସ୍ଵାଗତ ଜଣାଉଛି ।

ମମତାର ପୂଜା ଫୁଲ -ଜିତେନ୍ଦ୍ର ସାହୁ

ଦୁନିଆରେ ସତେ ଡାକ ଅଛି ଯେତେ
ସବୁଠାରୁ ଶ୍ରେଷ୍ଠ ମାଆ,
ଡାକିଦେଲେ ଥରେ ଓଠୁ ମହୁ ଝରେ
ଏତେ ମିଠା ତାର ନାଆଁ,,।।
ସର୍ବତ୍ର ପୂଜିତା ଅଟେ ଅଯାଚିତା
ପ୍ଲାବିତ ତା ପରିଚୟ ,
ସରଳ ସୁନ୍ଦର ରୂପଟି ତାହାର
ଲାଗେ ସଦା କମନୀୟ ,,।।
ସ୍ନେହ ସୁଧାମୟୀ ସେ ବାତ୍ସଲ୍ୟମୟୀ
ନାହିଁ ତା' କପଟ ଛନ୍ଦ,
ଲାଗଇ ସୁନ୍ଦର ଘର ବି ମନ୍ଦିର
ପଡିଲେ ତା' ଲକ୍ଷ୍ମୀ ପାଦ,,।।
କେ ପର ଆପଣା ଦୁରେ ପ୍ରତାରଣା
ସଭିଙ୍କୁ କୋଳେଇ ନିଏ,
ସ୍ରଷ୍ଟାଙ୍କ ସୃଷ୍ଟିର ନିଆରା ନିର୍ଝର
ଆକାଶ ମଥା ନୂଆଁଏ,,।।
ଅସହ୍ୟ ଯାତନା ନୁହେଁ ଆନମନା
ଲୁଚେଇ ଅନ୍ତରେ ବ୍ୟଥା,
ଚାପି ରଖି କୋହ ପିଇ ସବୁ ଲୁହ
ହସି ହସି କହେ କଥା,,।।
ଦୟା ଓ କ୍ଷମାର ନିସ୍ବାର୍ଥ ପ୍ରେମର
ବିଶାଳ ସାଗର ସିଏ,
ତ୍ୟାଗର ମୂରତି କରୁଛି ପ୍ରଣତି
ତା' ପରି ନୁହଁଇ କିଏ ?।।
ସୁଝି ହେବନାହିଁ ଯୁଗ ଯୁଗ ପାଇଁ
ଋଣ ତା ଅମୂଲ ମୂଲ,
ମାଆ ରୂପେ ସିଏ ଠାକୁରାଣୀ ଟିଏ
ମମତାର ପୂଜା ଫୁଲ,,।।


ଜିତେନ୍ଦ୍ର ସାହୁ
ଏମ୍.ତେନ୍ତୁଳିଆ, ପୋଲସରା, ଗଞ୍ଜାମ

Post a Comment

0 Comments