Children World

ଓଡିଆ ସାହିତ୍ୟ ଓ ସଂସ୍କୃତିର ନିଆରା ସ୍ଵର... ତିନିଶହରୁ ଉର୍ଦ୍ଧ ଲେଖକ ଲେଖିକା ଏବଂ ଦୁଇଲକ୍ଷରୁ ଉର୍ଦ୍ଧ ପାଠକ ପାଠିକା ମାନଙ୍କର ପ୍ରିୟ ଇ-ସାହିତ୍ୟ ୱେବ ପୋର୍ଟାଲ ବଣମଲ୍ଲୀର ମହକ ଆପଣଙ୍କୁ ସ୍ଵାଗତ ଜଣାଉଛି ।

ଆସରେ ଗଢିବା ନୂଆ ଭାରତ - ଶରତ ଚନ୍ଦ୍ର ଜାଲି

ଆସରେ ଗଢିବା ନୂତନ ଭାରତ
ସଭିଏଁ ମିଳିତ ହେଇ
ନୂତନ ଚେତନା ନବୀନ ଭାବନା
ହୃଦୟେ ଉଠିବ ଚେଇଁ ॥

ଅଖଣ୍ଡ ଭାରତ ଖଣ୍ଡବିଖଣ୍ଡିତ
ହେବାକୁ ତ ଦେବାନାହିଁ
ମୁକ୍ତିର ବାରତା ସ୍ୱରାଜ୍ୟପତାକା
ଉଡି ବାଣ୍ଟୁଥିବ ଯହିଁ ॥

ହିନ୍ଦୁ,ମୁସଲମାନ,ଶିଖ୍,ଖ୍ରୀଷ୍ଟିୟାନ
ଭାଇଚାରା ଭାବ ନେଇ
ବଞ୍ଚିବା ମରିବା ଯାହାବି କରିବା
ଦେଶର ମାତୃକା ପାଇଁ ॥

ଦେଶର ଅଇରି ଜାତିର ବଇରୀ
ସମୂଳେ ବିନାଶି ଦେବା
ନୂତନଭାରତ ଦାୟାଦ ଆମେରେ
ଲକ୍ଷ୍ୟ ଆମ ମାତୃସେବା ॥

ସଚେତନଶୀଳ ଲୋକଶକ୍ତି ନେଇ
ଜାତୀୟସ୍ତରେ ଲଢିବା
ଜାତୀୟ ସ୍ୱାର୍ଥକୁ ଅଧିକାର ଦେଇ
ନିଜ ସ୍ୱାର୍ଥ ଦଳିଦେବା ॥

ସବୁ ମନେ ଖୁସି ସ୍ୱାସ୍ଥ୍ୟ,ଶିକ୍ଷା,କୃଷି
ନୂଆ ରୂପେ ଭେଟି ଦେବା
ଭ୍ରଷ୍ଟାଚାର,ବ୍ୟାଧି,ଦାରିଦ୍ର୍ୟତାଆଦି
ନଥିବ କେଉଁଠେ ସଦା ॥

ସଂପ୍ରଦାୟବାଦ ଆଉ ଜାତିଭେଦ
ସାଇବର ଅପରାଧ
ବ୍ୟାଙ୍କ ଠକେଇ ଦେବାକୁ ଦୂରେଇ
ହୋଇବା ସଂକଳ୍ପବଦ୍ଧ ॥

ନୂତନଭାରତ ନିର୍ମାଣ ପଥେ
ଅାସୁଯେତେ ବାଧାବିଘ୍ନ
ଡରିବାର ନାହିଁ ଚାଲରେ ଆଗେଇ
ଆଜିପରା ଶୁଭଲଗ୍ନ ॥

ଶୁଭ ଅବସରେ ଜନନୀ ଆମକୁ
ଦେବେ କୋଟି ଆଶୀର୍ବାଦ
ଅମା ଅନ୍ଧକାର ଅପସରି ଯିବ
ଚାଖିବା ସ୍ୱାଧିନ ସ୍ୱାଦ ॥

ତେବେ ସବୁସ୍ୱପ୍ନ ସାକାର ହୋଇବ
ହସିବ ଭାରତଭୂଇଁ
ମହାତ୍ମା ସକଳ ନୂଆଭାରତକୁ
ଖୁସିରେ ଆସିବେ ଧାଇଁ ॥


ଶରତ ଚନ୍ଦ୍ର ଜାଲି
ପଥରା, ଖଲ୍ଲିକୋଟ, ଗଞ୍ଜାମ

Post a Comment

0 Comments