Information

"ସ୍ଵାଗତିକା" ସାହିତ୍ୟ ପତ୍ରିକା ନିମନ୍ତେ ଇ-ମେଲ, ହ୍ଵାଟସଆପ ଓ ଡାକ ମାଧ୍ୟମରେ କବିତା ପଠାନ୍ତୁ । କବିତା ପଠାଇବାର ଶେଷ ତାରିଖ ୩୦/୧୧/୨୦୧୮ ଏବଂ କବିତାର ପରିଧି ୧୬ ରୁ ୨୦ ଧାଡି ମଧ୍ୟରେ ରହିବା ଆବଶ୍ୟକ । Email - swagatika.nishikanta@gmail.com / WhatsApp - 8018646704 / By Post - The Chief Editor, Swagatika, At - Lokipur, PO - Gadamanatir, Dist - Khordha, Pin-752062, Odisha.

ରଜ ମଉଜ - ରଶ୍ମି ରଞ୍ଜିତା ମିଶ୍ର (ରୋଜି)

ରଜ ଦୋଳି କେଂ କଟ
ନାହିଁ ଭାଇ ମୁଣ୍ଡେ ସୁନା ମୁକୁଟ ଲୋ
ଜଞ୍ଜାଳ ଜାଲ ରେ ସେ ଛଟପଟ ।

ଝିଅ, ବୋହୁ ତୋଟାମାଳେ
ଜମାନ୍ତିନି ଭିଡ଼ ରଜ ଦୋଳିରେ ଲୋ
ଆଜି ପିଲାଚୋର ଡରେ ।

ଦୋଳି ର ସରାଗ ନାହିଁ
ଦୋଳି ଏବେ ଲାଗେ ବିଦ୍ୟାଳୟରେ ଲୋ
କୁନା,କୁନୁମୁନୁ ପାଇଁ ।

ନାହିଁ ସେହି ସଜବାଜ
ପାଦରେ ଅଳତା, ମୁଖେ ଖିଲି ପାନ
କୁଆରୀ ମନ ମଉଜ ।

ରଜ ପାନ ରେ ନାହିଁ ଶରଧା
ପଞ୍ଜାବୀ ପୁଡ଼ିଆ ମୁଚୁକୁନ୍ଦ ହସି
ପିଠିରେ ମାରଇ ବିଧା ।

ପୋଡ଼ପିଠା ସ୍ଵାଦ ଭୁଲି
ପିଜା,ବରଗର ନେଲେ ଆଦରି ଲୋ
ନାଳିଆ ବୋତଲ ଖୋଲି ।

କବାଡି, ବାଗୁଡି ଖେଳ
ସପନ ହେଲାଣି ରଜ ପରବେ ଲୋ
ଲାଗୁଛି ଜୁଆଡି ଭିଡ଼ ।

ଗଞ୍ଜା ଲଢେ଼ଇ ଚୁଲିକୁ ଗଲା
ତନ୍ଦୁରୀ ରୂପେ ପେଟରେ ପଶିଲା ଲୋ
ବଡ଼ ବଡୁଆଙ୍କ ମୁହେଁ ତାଲା ।

ନାହିଁ ସେ ପାଇକ ଠାଣି
ବର୍ଚ୍ଛା, ତଳୁଆର କାଳଙ୍କିଲାଣି ଲୋ
କଥା କଥାକେ ବନ୍ଧୁକ ବାଣୀ ।

ପରମ୍ପରା ରକ୍ଷା ପାଇଁ
ସହରୁ ଗାଁ କୁ ନ ଆସ ଧାଇଁ ହୋ
ଆଉ ଗାଁ ଆଗଭଳି ନାହିଁ ।


ନାହିଁ କା' ମନେ ସରାଗ
ରଜ ପରବକୁ ପାଳିବେ ଭାଳି ଲୋ
ରଖି ଭାଇଚାରା ଭାବ ।


ରୋଜି ମିଶ୍ର
ବ୍ରାହ୍ମଣ କୁଶଡିହ, ବାଲୁଗାଁ, ଖୋର୍ଦ୍ଧା

Post a Comment

0 Comments