Children World

ଓଡିଆ ସାହିତ୍ୟ ଓ ସଂସ୍କୃତିର ନିଆରା ସ୍ଵର... ତିନିଶହରୁ ଉର୍ଦ୍ଧ ଲେଖକ ଲେଖିକା ଏବଂ ଦୁଇଲକ୍ଷରୁ ଉର୍ଦ୍ଧ ପାଠକ ପାଠିକା ମାନଙ୍କର ପ୍ରିୟ ଇ-ସାହିତ୍ୟ ୱେବ ପୋର୍ଟାଲ ବଣମଲ୍ଲୀର ମହକ ଆପଣଙ୍କୁ ସ୍ଵାଗତ ଜଣାଉଛି ।

ଅନ୍ତିମ ଯନ୍ତ୍ରଣା - ଶରତ ଚନ୍ଦ୍ର ଜାଲି

ଦିନେ ନଭଜିଲୁ ପ୍ରଭୁଙ୍କର ନାମ
ସଂସାରେ ମଜିଲୁ ଛାଡି ପୁଣ୍ୟକର୍ମ ।
ଅଧର୍ମପଙ୍କରେ ହେଲୁ ନଟପଟ
ଅନ୍ତକାଳେ ହେବୁ କେତେ ଛଟପଟ ॥

ପଶୁପରି କରୁ ଜୀବନଯାପନ
ବୃଥା ଗପସପେ ହରିଲୁ ତୋଦିନ ।
ଆହାର,ନିଦ୍ରା,ମୈଥୁନେ ଦେଲୁ ମନ
ଦିନେ ନଖୋଜିଲୁ ଜୀବରଜୀବନ ॥

କହିଁପାଇଁ ଆସିଥିଲୁ ଏ ଧରାକୁ
କିଏ ଗଢିଥିଲା ତୋ ଆତ୍ମାପାରାକୁ ।
ପାରା ଦିନେ ଉଡିଯିବ ଗଗନକୁ
ଭାବିଲୁନି ଥରେ ଏ ସାର କଥାକୁ ॥

ମାୟା ରଂଗମଞ୍ଚେ କଲୁ ଅଭିନୟ
ଅଭିନୟ ସାରି ଯିବୁ ଯମାଳୟ ।
ଯମପୁରେ କେତେ ପାଇବୁ ଯନ୍ତ୍ରଣା
ଏ ସମୟେ ସାହା କାଳିଆ କରୁଣା ॥

ବେଳ ଥାଉଥାଉ ବିବେକୀ ପୁରୁଷ
ପୁରୁଷୋତ୍ତମକୁ ବାରମ୍ବାର ଘୋଷ ।
ସେଇ ପ୍ରଭୁ ଏକା କରିବେ ଉଦ୍ଧାର
ଅନ୍ତିମ ଯନ୍ତ୍ରଣା ହରିବେ ଜୀବର ॥

ତେବେ ସିନା ଜୀବ ହୋଇବ ମୁକତି
ମୁକତି ପସରା ପ୍ରଭୁ ଲକ୍ଷ୍ମପତି ।
ତାଙ୍କ ପାଦେ ଢାଳି ଭକତି ପ୍ରଣତି
ଏ ଗୀତ ଶରତ କରୁଅଛି ଇତି ॥


ଶରତ ଚନ୍ଦ୍ର ଜାଲି
ପଥରା, ଖଲ୍ଲିକୋଟ, ଗଞ୍ଜାମ

Post a Comment

0 Comments