Children World

ଓଡିଆ ସାହିତ୍ୟ ଓ ସଂସ୍କୃତିର ନିଆରା ସ୍ଵର... ତିନିଶହରୁ ଉର୍ଦ୍ଧ ଲେଖକ ଲେଖିକା ଏବଂ ଦୁଇଲକ୍ଷରୁ ଉର୍ଦ୍ଧ ପାଠକ ପାଠିକା ମାନଙ୍କର ପ୍ରିୟ ଇ-ସାହିତ୍ୟ ୱେବ ପୋର୍ଟାଲ ବଣମଲ୍ଲୀର ମହକ ଆପଣଙ୍କୁ ସ୍ଵାଗତ ଜଣାଉଛି ।

ମୌସୁମୀ - ଦେବବ୍ରତ ଜେନା

ମୌସୁମୀ ଗୋ ତୁମ ବାଟ ଚାହିଁ ଚାହିଁ
ଆଖି ମୋ ଜଳକା ହେଲା
ଆସିବ ଆସିବ ପ୍ରତୀକ୍ଷା କରିଛି
ତୁମେ କି ହେଲ ବାଉଳା ।।(୧)
ଜଗତବାସୀ ଯେ ହେଲେଣି ଅତିଷ୍ଠ
ପ୍ରଚଣ୍ଡ ନିଦାଘ କୋପେ
ଶୁଭୁ ନାହିଁ କି ଗୋ ସେମାନଙ୍କ ଡାକ
ଅନାଇଛନ୍ତି ଚାତକେ ।।(୨)
ତୁମ ମିଠା ସ୍ପର୍ଶ ପାଇବା ପାଇଁ କି
ସକଳ ଅପେକ୍ଷାରତ
ଆସିବ ଛୁଇଁବ ବରଷି ଵି ଯିବ
ସର୍ବେ ହେବେ ଅହ୍ଲାଦିତ ।।(୩)
ତୃଷା ନିବାରିବ ,ଖୁସି ବାଣ୍ଟିଦେବ
ସକଳ ଜୀବଙ୍କ ପ୍ରାଣେ
ଚାଷୀ କୂଳ ହୃଦେ ହରଷ ବୁଣିବ
ଖେଳାଇ ଆନଂଦ ମନେ ।।(୪)
ଆସିଥାନ୍ତ ଯଦି ସଅଳ ଏ ସନ
ଭିଜିଥାନ୍ତି ତୁମ ସଙ୍ଗେ
ପାଇଥାନ୍ତି ତୁମ ପୀରତି ବାସନା
ତୁମରି ପରଶେ ଅଙ୍ଗେ ।।(୫)
ଆଙ୍କନ୍ତି ତୁମ ସେ ଲାବଣ୍ୟ ତନୁକୁ
ସିଲଟରେ ମୋ ମନର
ହଜି ମୁଁ ଯାଆନ୍ତି ତୁମ ଶ୍ରୀରୂପରେ
ପାସୋରି ମୋ ଅସ୍ତିତ୍ବର ।।(୬)
ମୋସୁମୀ ଗୋ ତୁମେ ଫେରିଆସ ତେଣୁ
ଭାଙ୍ଗିଦିଅ ତୁମ ରୁଷ
ପିପାସିତ ପ୍ରାଣେ ଭରିଦିଅ ଏଣୁ
ଅସୁମାରୀ ହୋଇ ବର୍ଷ ।।(୭)

Post a Comment

0 Comments