OUR READERS STATUS AROUND THE GLOBE : INDIA-362119 CANADA-354 CHINA-881 FRANCE-1727 GERMANY- 2083 QATAR - 61 SINGAPORE - 1114 UNITED STATES - 14819 UNITED KINGDOM - 553 UNITED ARAB EMIRATES - 926 UKRAINE-47 UNKNOWN REGIONS-5627

ଧନ୍ୟବାଦ ମୌସୁମୀ - ରମେଶ ଚନ୍ଦ୍ର ମିଶ୍ର

ଧନ୍ୟବାଦ ମୌସୁମୀ - ରମେଶ ଚନ୍ଦ୍ର ମିଶ୍ର

ମଉସୁମୀ ତୁମେ ଆସିଗଲ ବୋଲି
ପୁଲକିତ ଧୁଳି ଧରଣୀର ବକ୍ଷେ
ଖୁସିର ରୋଷଣୀ ଜଳେ,
ଜୀବ, ତରୁ, ଲତା ସବୁରି ଅନ୍ତରେ
ଗ୍ରୀଷ୍ମ ତାପିତ ପ୍ରାଣରେ ପ୍ରାଣରେ
ସପନ ଭଉଁରୀ ଖେଳେ । ୧

ଫୁଲେଇ ତଟିନୀ ନୂପୁର ଛନ୍ଦେ
ଫୁଲି ଫୁଲି ଗୀତ ରାଗିଣୀ କଣ୍ଠେ
ସାଗର କୋଳକୁ ଧାଏଁ
ଆଗାମୀ ଦିନର ସୁଖ ସପନରେ
କାଳିଆ କଷରା ବଳଦକୁ ଯୋଚି
ଚଷା ଭାଇ ଗୀତ ଗାଏ । ୨

ଧରଣୀ ଖୁସିରେ ଆକାଶ ବିଭୋର
ନୀଳ ମେଘମାଳା ପଟୁଆର କରି
ରୋଷଣୀରେ ମତୁଆଲା
ଶ୍ୟାମ ଦୂର୍ବାଦଳ ହରିତ ବାସରେ
ନିଜକୁ ସଜେଇ ସୁନ୍ଦର ସାଜରେ
ନଭ ଚିତ୍ତ ମୋହିନେଲା । ୩

ଜଙ୍ଗଲେ ମୟୁର ବିଲରେ ମଣ୍ଡୁକ
ଝିଙ୍କାରୀର ଝିଁ` ଝିଁ` ଶବଦରେ
ଆନନ୍ଦ ଉଚ୍ଛୁଳି ଯାଏ
ଗାଁ ଦାଣ୍ଡେ ଟିକି ଶିଶୁମାନଙ୍କର
ପାଣି ସୁଅ ଧାରେ କାଗଜ ଡଙ୍ଗା
ହଲି ହଲି ଭାସୁଥାଏ । ୪

ଟଗର, ତରାଟ, ରଜନୀଗନ୍ଧା
ମାଳତୀ, ମନ୍ଦାର ଫୁଲେ ସଜ ହୋଇ
ବନ ଉପବନ ତୋରା
ବାଦଲେ ସୂରୁଯ ମୁହଁ ଲୁଚାଉଛି
ଇନ୍ଦ୍ରଧନୁର ସପତ ରଙ୍ଗେ
(କେବେ କେବେ) ଚମକିଉଠେ ଏ ଧରା । ୫

ମଉସୁମୀ ତୁମେ ଧନ୍ୟ କରିଛ
ପରଶି ତୁମର ଅମୃତ ବିନ୍ଦୁ
ମାଆ ମନ ଆମୋଦିତ
ଜୀବ ଜଗତର ଆନନ୍ଦେ ପରମ
ନିଶ୍ଚିନ୍ତ ହୋଇ ଆରମ୍ଭ କରିଛି
ନୀଳାଚଳେ ଘୋଷଯାତ । ୬

ଧନ୍ୟ ତୁମେ ଗୋ ମଉସୁମୀ ଧନ୍ୟ !
ଧରଣୀ ରାଣୀର ଯୋଗ୍ୟା ଦୁହିତା
ମାଆ ଦୁଃଖ ଅନୁସରି
ଅମୃତ ଧାରା ବରଷି ମହୀରେ
ଆମନ୍ତ୍ରି ଆଣିଛ ଆନନ୍ଦର ଫଲ୍ଗୁ
ଫେରାଇଛ ସୁଖ ଶିରି । ୭


ତାପସ କୁଟୀର,
ବଇଣ୍ଡା, ଅନୁଗୋଳ ।

1 Comments

  1. Ghanashyam SahooJuly 19, 2018 at 7:50 PM

    ସୁନ୍ଦର ଶବ୍ଦ ସଂଯୋଜନା। ବହୁତ ସୁନ୍ଦର ଉପସ୍ଥାପନା

    ReplyDelete

ବଣମଲ୍ଲୀର ମହକ ତାହାର ପାଠକ ପାଠିକା ମାନଙ୍କ ନିକଟରୁ ସର୍ବଦା ଗଠନମୂଳକ ମତାମତ ଆଶା କରିଥାଏ । ଯାହାକି ଜଣେ ସ୍ରଷ୍ଟାଙ୍କୁ ଉଚିତ ମାର୍ଗ ପ୍ରଦର୍ଶନ କରିବାରେ ସକ୍ଷମ ହୁଏ । ଯଦି ଆପଣ ଉପରୋକ୍ତ ବିଷୟଟି ଉପରେ ନିଜର ମତାମତ ପ୍ରଦାନ କରିବାକୁ ଚାହୁଁଛନ୍ତି, ତେବେ ଆପଣଙ୍କ ଗୁଗୁଲି ଆକାଉଣ୍ଟ ମାଧ୍ୟମରେ ନିଜର ମତାମତ ପ୍ରଦାନ କରନ୍ତୁ ।