ତୁମପାଇଁ (ଭାଗ-୨) - ରାଜେଶ ପୂଜାରୀ

ତୁମପାଇଁ (ଭାଗ-୨) - ରାଜେଶ ପୂଜାରୀ

ତୁମ ହସ ପାଇଁ ଆଗୋ ପ୍ରେମକଇଁ
ଝରୁ ଯେତେ ଆଖିବାରି,
ଲାଗେ ତାହା ମତେ ଶୀତ ପାହାନ୍ତିର
ଶିଶିର କଣିକା ପରି ‌ ।

ତୁମ ସୁଖ ପାଇଁ ଯେତେ ଯାହା ଦୁଃଖ
ଶୀତଳ ଚନ୍ଦନ ଲେପ,
ସତେଜ ହୁଅଇ ଆହୁରି ଆହୁରି
ମନ ତଳ ପ୍ରୀତି ଦୀପ ।

ତୁମେ କାନ୍ଦିଦେଲେ ମୋ ମନ ଗଗନେ
ଶୋକରେ ବାଦଲ ଛାଏ,
ଚଗଲି ବରଷା ମୋ ମନା ନମାନି
ଅଥକେ ବରଷି ଯାଏ ।

ଶୋକାସିକ୍ତ ମୁଖ ଚାହିଁ ମୁଁ ଅରକ୍ଷ
ଲାଗେ ଛାଡ଼ନ୍ତି ଜଗତ,
ଲାଗଇ ବିଷମ ଭେଦଇ ମରମ
ଉକ୍ତ ପରିସ୍ଥିତି ମିତ ।

ତୁମ ଅଶ୍ରୁବୁନ୍ଦା ଆଗୋ ସ୍ବପ୍ନଗନ୍ଧା
ଯତନେ ସାଇତି ରଖ,
ମୋ ଭାଗକୁ ଠେଲି ଦିଅ ପଛେ ପ୍ରିୟା
ଅଛି ଯାହା ସବୁ ଦୁ଼ଃଖ ।

କଥା ଦିଅ ମତେ ଏମିତିକା ବେଳ
ଆସିବନି ଆଉ ଜମା,
ନିଜେ ହସି ହସି ମତେ ହସେଇବ
ମନୋରାଜ୍ୟ ରାଜଜେମା ।

ଯେତେ ଯାହା ଚାହଁ ନିସଙ୍କୋଚେ କୁହ
ଶୀଘ୍ର ଆଣିଦେବି ଥୋଇ,
କହିଲେ ମୋହର ପ୍ରାଣ ନିଛାବର
କରିଦେବି ତୁମପାଇଁ ।


ରାଜେଶ ପୂଜାରୀ
କୁଶମେଲ, ଝାରସୁଗୁଡ଼ା

0 Comments