ଠିକ୍ ସେମିତି ଅଛି ପାଗ - ରାଜେଶ ପୂଜାରୀ

ଠିକ୍ ସେମିତି ଅଛି ପାଗ - ରାଜେଶ ପୂଜାରୀ

ନେପଥ୍ୟୁ ମିଳିଲା ସୂଚନା
ଆଉ ହୁଅନା ଆନମନା
ନଈପଠା ଚିନ୍ମୟ
କାଶତଣ୍ଡିର
ହୃଦଜୟୀ ମହକରେ,
ମୋର ଅନାବରଣ ଦେହକୁ
ବାର ବାର ଯାଉଛି ସ୍ପର୍ଶି
ଚଗଲି ଲହରୀମାଳା
କୁତୁକୁତୁ କରିବାକୁ ।

ପରିଚ୍ଛଦ ସବୁ ଉଡ଼ି ଗଲେଣି
ବେପରୁଆ ବାଆ ସାଥିରେ
ଖିଆଲ ନାହିଁ ଜମାରୁ
କାରଣ ମୁଁ ସେଦିନର
ପୁନରାବୃତ୍ତିର
ଛବି ଅଙ୍କନରେ ବିଭୋର ।

ସେଦିନ ପହଁରିଥିଲେ ଦୁହେଁ
ରାନ୍ଧୁଣି ଗୁଧୁଆରୁ
ଗୋଠ ବାହୁଡ଼ା ଯାଏ ।

ଶେଷରେ
ଶାନ୍ତିରେ-କ୍ଲାନ୍ତିରେ
ଢଳି ପଡ଼ିଲେ ପଠାରେ
ଫୁଲକୁ କରିଥିଲେ ଦସଣା
କଳାଘୁମର ମେଘକୁ କରି ଓଢ଼ଣା
ବାଲୁକା ରାଶିରୁ କିଛି
ବୋଳି ଥିଲେ ଚନ୍ଦନ କରି
ଖୋଳା ଦେହରେ ।

ପରେ ପରେ ହେଲା ଯାହା ସବୁ
ଜାଣିନି, କାହିଁକି ହେଲା
କଦାପି ହେବାର ନଥିଲା !

ମୋ ସୁନା.. ମୋ ଧନ
ସେ ସବୁ ଭ୍ରମଧାରଣାକୁ
ଏଡ଼ାଇ ଆସୁନ ଚାଲି
ପୁଣିଥରେ ଗଢ଼ିବା ଭାଙ୍ଗି ଯାଇଥିବା
ବିଲୁଆ ଘର
ଖଞ୍ଜିଣ ତୋରଣ ପ୍ରୀତିର ।

କାହିଁକି ନା..
ଠିକ୍ ସେମିତି ଅଛି ପାଗ
ଯା'ସାଥେ ଜଡ଼ିତ
ଆମର ଅନେକ-
ଖଟ୍ଟା ମିଠା ଅନୁରାଗ।




କୁଶମେଲ, ଝାରସୁଗୁଡ଼ା

1 Comments

  1. ଲକ୍ଷ୍ମୀନାରାୟଣ ପଟ୍ଟନାୟକJuly 14, 2018 at 10:42 PM

    ସୁନ୍ଦର କବିତା

    ReplyDelete

ବଣମଲ୍ଲୀର ମହକ ତାହାର ପାଠକ ପାଠିକା ମାନଙ୍କ ନିକଟରୁ ସର୍ବଦା ଗଠନମୂଳକ ମତାମତ ଆଶା କରିଥାଏ । ଯାହାକି ଜଣେ ସ୍ରଷ୍ଟାଙ୍କୁ ଉଚିତ ମାର୍ଗ ପ୍ରଦର୍ଶନ କରିବାରେ ସକ୍ଷମ ହୁଏ । ଯଦି ଆପଣ ଉପରୋକ୍ତ ବିଷୟଟି ଉପରେ ନିଜର ମତାମତ ପ୍ରଦାନ କରିବାକୁ ଚାହୁଁଛନ୍ତି, ତେବେ ଆପଣଙ୍କ ଗୁଗୁଲି ଆକାଉଣ୍ଟ ମାଧ୍ୟମରେ ନିଜର ମତାମତ ପ୍ରଦାନ କରନ୍ତୁ ।