ଚିଲିକା - ଗୌରାଙ୍ଗ ଚରଣ ବେଉରା

ଚିଲିକା - ଗୌରାଙ୍ଗ ଚରଣ ବେଉରା

ନୀଳ ସାଗରୀକା ନୀଳାମ୍ବୁ ଚିଲିକା
ଉତ୍କଳର ଗଳାହାର,
ଜଳ ଜୀବଂକର ମଧୁର ନିଳୟ
କବି ଉପମାର ମାଳ ॥

ତୋ ଜଳେ ଭାସନ୍ତି ମରାଳ ପନ୍ତି ଗୋ
ଭାସନ୍ତି ପୋତ ପଂକତି,
ନୀଳ କଇଁ ହସେ ତୋ ଚାରୁ ହସରେ
ହସେ ପଟିକା ସଂପତ୍ତି ॥


ନୀଳ ନୀଳିମାର ବାଦଲ ନାଚଇ
ତୋ ନୀଳ ନୀଳବକ୍ଷରେ,
ହଂସ ହଂସରାଳି କରୁଥାନ୍ତି କେଳି
ଦିବ୍ୟ ପୁନେଇ ଜହ୍ନରେ ॥

ତାଳବଣ ଶୋହେ ବିହଂଗ କୁଜନେ
ଚଢେଇ ଗୁହା ହସଇ,
ପାରିକୂଦ ଛାୟା ମାଲୁଦ ପ୍ରଛାୟା
ତୋ ଜଳ ରାଶିରେ ଥାଇ॥


ଦୂର କାଳିଜାଈ ଶୋଭା ତୋ ମଣ୍ତଇ
ବେଦଧ୍ୱନୀ ସଂଗୀତରେ,
ପ୍ରକମ୍ପିତ ହୁଏ ଛାୟା ବିଭାବରୀ
ଘଣ୍ଟା ମାଦଳର ତାଳେ ॥

ପୋତରେ ମଶାଲ ଦିଶେ ଝଲମଲ
ମୀନଜୀବିଂକ ଆସରେ,
ଯେସନେ ଲୁଟେରା ମଶାଲେ ଲୁଟଇ
ଘଂଚ ଅମା ଅନ୍ଧାରରେ ॥


ତାରା ନାଚୁଥାନ୍ତି ତୋ ନୀଳ ବକ୍ଷରେ
ସତେ ପାରିଜାତ ଫୁଲ,
ବାଦଲ ନାଚଇ ଯେସନେ ବୋଇତ
ସତେ କି ଯେ ଐରାବତ ॥

ଭାସିଆସେ ଦୁରୁ ପୋତପାଳ ଗୀତ
ମନ ହୃଦୟ କନ୍ଦରୁ,
ବାହୁଡନ୍ତି ଘର ହୋଇ ତରବର
ସାଜି ବାଂଛା କଲ୍ପତରୁ ॥


ବିହଂଗ ଆସର ଘନ ଜଳରାଶି
ଉପମାର ସୁନାମୁଖୀ,
ହାରିଛନ୍ତି କବି କେତେ କାବ୍ୟକାର
ତୁହି ଅଟୁ ମୁକସାକ୍ଷୀ ॥



କାମଧେନୁ ତୁ ଯେ ସକଳ ଜୀବର
ଶୋଭାରାଶି ଭିଆଇଛୁ,
ସଂପଦ ଶାଳିନୀ ଶୋଭାର ମାଳିନୀ
ଦର୍ଶକ ମନ ମୋହିଛୁ ॥






ଶିକ୍ଷକ, କୁଲିଆମାଲ ଉଚ୍ଚ ବିଦ୍ୟାଳୟ

0 Comments