Children World

ଓଡିଆ ସାହିତ୍ୟ ଓ ସଂସ୍କୃତିର ନିଆରା ସ୍ଵର... ତିନିଶହରୁ ଉର୍ଦ୍ଧ ଲେଖକ ଲେଖିକା ଏବଂ ଦୁଇଲକ୍ଷରୁ ଉର୍ଦ୍ଧ ପାଠକ ପାଠିକା ମାନଙ୍କର ପ୍ରିୟ ଇ-ସାହିତ୍ୟ ୱେବ ପୋର୍ଟାଲ ବଣମଲ୍ଲୀର ମହକ ଆପଣଙ୍କୁ ସ୍ଵାଗତ ଜଣାଉଛି ।

ପ୍ରକୃତିର ବିଳାପ - ପବିତ୍ର କୁମାର ନାୟକ

ବୈଶାଖର ଝାଞ୍ଜି ଅବିରତେ ବହେ
ବରଷାର ଦେଖା ନାହିଁ
ଅଳପ ବରଷି ବଉଦ ରୁଷିଛି
ଅଭିମାନ ଛାଡୁ ନାହିଁ !

ସପନ ସାଜିଛି ସେକାଳ ଝଡି ଯେ
ଅଦିନେ ଆସଇ ଝଡ଼
ଧାରା ଶ୍ରାବଣର ମୁଷଳ ଧାରାଟି
ଭୁଲି ଗଲାଣି ତା'ନୀଡ଼ !

ଅଧା ବାଟେ ଆଜି ଅଟକି ଯାଉଛି
କାହିଁକି ପଚାର ଥରେ
ଅଦିନେ ବରଷି ଅକାରଣେ କାହିଁ
ବନ୍ୟା ଭିଆଏ ମରୁରେ !

ନାହିଁ ସେ ବରଷା ନା ଅଛି ଶରତ
ନା ଅଛି ଚୋରା ଚଇତି
ରହିଛି କେବଳ ଧରଣୀ ବୁକୁରେ
ଗ୍ରୀଷ୍ମର ଅସହ୍ୟ ତାତି !

ହେମନ୍ତ ଅସ୍ତିତ୍ବ କେବେଠୁ ହଜିଛି
ବସନ୍ତ ଗୁମୁରି କାନ୍ଦେ
ପଥହରା ହୋଇ ସର୍ବସ୍ବ ହରାଇ
ମଳୟ ପଡ଼ିଛି ଦ୍ୱନ୍ଦେ !

ଯାହାସବୁ ଘଟେ ଆମରି ଯୋଗୁଁ ତ
ଏକଥାକୁ ଭୁଲି ଯାଅନି
ନୀରବତା ମନେ ଚେତେଇ ଦେଉଛି
ଅଭିମାନୀ ଏ ମେଦିନୀ !

ଶ୍ରୀହୀନ ଯେ ଆଜି ବସୁମତୀ ରାଣୀ
ନାହିଁ ତାର ପୂର୍ବ ଠାଣି,
ସର୍ବେ ଏକମନେ ରୋପିଦେଲେ ବୃକ୍ଷ
ଫେରିବ ଅତୀତ ପୁଣି !




ପବିତ୍ର କୁମାର ନାୟକ,
କେଲୁଆପଲ୍ଲୀ, ଗଞ୍ଜାମ

Post a Comment

0 Comments