Children World

ଓଡିଆ ସାହିତ୍ୟ ଓ ସଂସ୍କୃତିର ନିଆରା ସ୍ଵର... ତିନିଶହରୁ ଉର୍ଦ୍ଧ ଲେଖକ ଲେଖିକା ଏବଂ ଦୁଇଲକ୍ଷରୁ ଉର୍ଦ୍ଧ ପାଠକ ପାଠିକା ମାନଙ୍କର ପ୍ରିୟ ଇ-ସାହିତ୍ୟ ୱେବ ପୋର୍ଟାଲ ବଣମଲ୍ଲୀର ମହକ ଆପଣଙ୍କୁ ସ୍ଵାଗତ ଜଣାଉଛି ।

ଏମିତି କେମିତି ହେଲା - ପ୍ରଶାନ୍ତ କୁମାର ନାଥ

ପ୍ରଶାନ୍ତ କୁମାର ନାଥ
ସୁନ୍ଦରପୁର, ଉତ୍ତରକୂଳହାଟ, ପ୍ରୀତିପୁର, ଯାଜପୁର
ଦୂରଭାଷ : ୮୮୯୨୩୦୧୧୪୩

ସେକାଳ ପଖାଳ ହେଲାଣି ପୁରୁଣା
ଲାଗେ ସବୁ ନୂଆ ନୂଆ
ପହାନ୍ତା ପହରୁ କୁଆ ଡ଼ାକୁନାହିଁ
ଶୁଭୁଅଛି ଘୁଉଁ ଘାଆଁ ।
ଢ଼ିଙ୍କି କୁଟା ଚୁଡା ଭଜା ମୁଢି ଖାଇ
ସକାଳ ଟା କଟୁଥିଲା
ପିଜା ଓ ବର୍ଗର ପେଟିସି ପପସ୍
ସଭିଙ୍କୁ ଅଜଣା ଥିଲା ।
ବିନା ଟିଉସନେ ସେକାଳ ମଣିଷ
ଶିକ୍ଷିତ ଯେତେକ ହେଲେ
ଶହେ ଟିଉସନେ ଆଜିର ମଣିଷ
ମୁରୁଖ ପାଲଟି ଗଲେ ।
ଗୀତା ଭାଗବତ ପଢୁଥିଲେ ବସି
ଡିବିରି ଆଲୁଅ ଜାଳି
ଲୋଓ ଭୋଲଟେଜ୍ ହେଇଗଲେ ଟିକେ
ଶୁଭେ ଏବେ କେତେ ଗାଳି ।
ବିଲ ପାଣି ପିଇ ପୋଖରୀ ଗାଧୋଇ
ହେଉତ ନଥିଲା ରୋଗ
ଥଣ୍ଡା ହେଇଗଲେ କହୁଛନ୍ତି ଏବେ
ବଦଳୁଛି ପାଣିପାଗ ।
ସେକାଳେ ରୋଷେଇ ମାଟିର ଚୁଲିରେ
କରୁଥିଲେ କୁଟା ଜାଳି
ଏଇନେ ଗିଆସେ ରୋଷେଇ ପାଇଁକି
ଶାଶୁ ବୋହୁ କଲେ ପାଳି ।
ବାହାଘର କଥା ଶୁଣିଦେଲେ ଝିଅ
କାନ୍ଦୁଥିଲା କଇଁ କଇଁ
ବାହାଘର କଥା ଶୁଣି ଏବେ ଝିଅ
ନାଚୁ ଅଛି ଥେଇ ଥେଇ ।
ବାପା ଆଗେ କିଛି କହିବାକୁ ପୁଅ
କହୁଥିଲା ଥରି ଥରି
ଏବେ ପରା ବାପ ରହୁଅଛି ନିତି
ପୁଅକୁ ତାହାର ଡରି ।
ଭାବିଦେଲେ ଲାଗେ ସେସବୁ ମୁହୂର୍ତ୍ତ
କୁଆଡେ ଉଭେଇ ଗଲା
କେଇଟା ଦିନରେ ଏତେ ସବୁ କଥା
କେମିତି ବଦଳି ଗଲା ।

Post a Comment

0 Comments