ଶାଶ୍ଵତ ପ୍ରେମ - ସୁନୀଲ କୁମାର ବେହେରା

ଶାଶ୍ଵତ ପ୍ରେମ - ସୁନୀଲ କୁମାର ବେହେରା

ସୁନୀଲ କୁମାର ବେହେରା
ପଥରବନ୍ଧ, ଟାଙ୍ଗି, ଖୋରଧା

ଢଳଢଳ ନୀରେ ସୁଢଳ ସମ୍ଭାରେ
ଚାହିଁଅଛି ପଙ୍କଜିନୀ
ପଙ୍କରୁ ଜାତ ସେ ପଙ୍କରୁ ଉଦ୍ଭବ
ଦେବାଳୟ ପାଟରାଣୀ ॥୧॥

ପତର ଉପରେ ଶୁପତ ମଉନେ
ବିତିଯାଏ ତା'ର ରାତି
ଚାହିଁରହିଥାଏ ଉଦିତ ସୂରୁଜେ
କରିବାକୁ ମଧୁପ୍ରୀତି ॥୨॥


ଭାସ୍କର ଉଦିତେ ଚଳ ଚଞ୍ଚଳିତ
ପାଖୁଡାର ଅଙ୍ଗଭଙ୍ଗୀ
ନିବୁଜ ପାଖୁଡା ହୁଏ ପ୍ରସ୍ଫୁଟିତ
ସୂରୁଜ କିରଣ ଲଭି ॥୩॥

ପୀୟୁଷ ପରାଏ ରବିର କିରଣ
ଆନନ୍ଦରେ ଯାଉ ପିଇ
ଅନାବିଳ ପ୍ରେମ ଦିବ୍ୟଶିରୀ ତୋର
ସଞ୍ଜ ହେଲେ ଯାଉ ନଇଁ ॥୪॥


ହରଷ ଚିତ୍ତରେ ସାହାସ୍ୟ ବଦନେ
ସୂରୁଜେ ରହୁ ତୁ ଚାହିଁ
ଶାଶ୍ଵତ ତୋ ପ୍ରେମ ନିର୍ମଳ ହୃଦୟ
ପ୍ରତିଦାନ ଲୋଡା ନାହିଁ ॥୫॥

ମିଛ ଦୁନିଆଁରେ ପ୍ରେମ ନୈସର୍ଗିକ
ରହିଥିଲା ଥିବ ରହି
ପଦ୍ମ-ସୂରୁଜର ଭାବ ଦିଆନିଆ
କେଉଁଠାରେ ଆଉ ନାହିଁ ॥୬॥


ଜଳରାଶି କହେ ଶୁଣ ଲୋ ପଦୁଅଁ
ତୁ ଅଟୁ ସୌଭାଗ୍ୟବତୀ
ପ୍ରେମିକର ସତ୍ତା ସମୀପେ ନଥାଇ
ଲଭୁଛୁ ପୀରତି ନିତି ॥୭॥

ଆକାଶ ପାତାଳ ଦୂରତାରେ ଥାଇ
ଦିନକର ତୋର ସାଥୀ
ଉଛୁଳା ଯୌବନ ଅବସନ୍ନ ମନ
ଅପେକ୍ଷାରେ ପାହେ ରାତି ॥୮॥


ସୂରୁଜ ପରଶ ସୂରୁଜ ଦର୍ଶନ
ଲୋଡା ତୋର ପଦ୍ମରାଣୀ
ତୋ ପ୍ରେମ ସମ୍ମୁଖେ ଜଗତ ବିଫଳ
ନପାରନ୍ତି କେହି କଳି ॥୯॥

ଅମୃତ ବେଳାରେ ଶୁଭ ଲଗନରେ
ଗଢିଥିଲା ତୋତେ ବିହି
ଧନ୍ୟ ଲୋ ଉତ୍ପଳ ପ୍ରେମ ତୋ ଅମର
କୋଟିକରେ ଗୋଟେ ତୁହି ॥୧୦॥


2 Comments

  1. ପ୍ରତିକ୍ରିୟା ପ୍ରଦାନ ସମୟରେ ଯଦି ଆପଣଙ୍କ ନାମ ଓ ଠିକଣା ଲେଖନ୍ତେ ତେବେ ସମ୍ପୃକ୍ତ ଲେଖକ ଓ ପାଠକ ପାଠିକା ମାନେ ଆପଣଙ୍କ ପରିଚୟ ପାଇ ପାରନ୍ତେ । ଭବିଷ୍ୟତରେ ଏଥିପ୍ରତି ଦୃଷ୍ଟି ଦେବେ ବୋଲି ଆମେ ଆଶାବାଦୀ ।

    ReplyDelete

ବଣମଲ୍ଲୀର ମହକ ତାହାର ପାଠକ ପାଠିକା ମାନଙ୍କ ନିକଟରୁ ସର୍ବଦା ଗଠନମୂଳକ ମତାମତ ଆଶା କରିଥାଏ । ଯାହାକି ଜଣେ ସ୍ରଷ୍ଟାଙ୍କୁ ଉଚିତ ମାର୍ଗ ପ୍ରଦର୍ଶନ କରିବାରେ ସକ୍ଷମ ହୁଏ । ଯଦି ଆପଣ ଉପରୋକ୍ତ ବିଷୟଟି ଉପରେ ନିଜର ମତାମତ ପ୍ରଦାନ କରିବାକୁ ଚାହୁଁଛନ୍ତି, ତେବେ ଆପଣଙ୍କ ଗୁଗୁଲି ଆକାଉଣ୍ଟ ମାଧ୍ୟମରେ ନିଜର ମତାମତ ପ୍ରଦାନ କରନ୍ତୁ ।