Children World

ଓଡିଆ ସାହିତ୍ୟ ଓ ସଂସ୍କୃତିର ନିଆରା ସ୍ଵର... ତିନିଶହରୁ ଉର୍ଦ୍ଧ ଲେଖକ ଲେଖିକା ଏବଂ ଦୁଇଲକ୍ଷରୁ ଉର୍ଦ୍ଧ ପାଠକ ପାଠିକା ମାନଙ୍କର ପ୍ରିୟ ଇ-ସାହିତ୍ୟ ୱେବ ପୋର୍ଟାଲ ବଣମଲ୍ଲୀର ମହକ ଆପଣଙ୍କୁ ସ୍ଵାଗତ ଜଣାଉଛି ।

ରୂପସୀ - କାର୍ତ୍ତିକେଶ୍ୱର ସାହୁ

କାର୍ତ୍ତିକେଶ୍ୱର ସାହୁ
ଚଣ୍ଡିଆପଲା, ଖୋରଧା
ଦୂରଭାଷ : ୯୯୩୮୮୩୪୨୪୦

ଆଲୋ ସୁକୁମାରୀ ସପନ ସୁନ୍ଦରୀ
ସରଗ ରାଇଜ ପରୀ
ଗୋରା ଦେହେ ପିନ୍ଧି ନାଲି ପାଟ ଶାଢୀ
ଚମକୁ ଅଛୁ ଲୋ ଗୋରୀ ॥

ପାଦରେ ପାଉଁଜି ଅଳତାର ଗାର
ମଥାରେ ନାଲି ଟିକିଲି
ଆଖିରେ କଜଳ ଗଭାରେ ଗଜରା
ରୂପ ତୋର ଝିଲିମିଲି ॥


ନାକେ ନାକଚଣା କାନରେ କୁଣ୍ଡଳ
ଗଳାରେ ସୁବର୍ଣ୍ଣ ହାର
ହାତେ ତୋ କଙ୍କଣ ଅଙ୍ଗୁଳିରେ ମୁଦି
କି ଶୋଭା ବର୍ଣ୍ଣିବି ତୋର ॥

ଲୋ ଗଜଗାମିନୀ ତୁ ରାଜହଂସିନୀ
ମୁଖ ତୋର ଚାନ୍ଦ ପରି
ରମ୍ଭା, ଉର୍ବଶୀ ଅବା ସେ ମେନକା
କିଏ ହବ ତୋର ସରି ॥


ଗୋଲାପୀ ଓଠ ତୋ ମୃଦୁ ମୃଦୁ ହସ
ଲକ୍ଷେ ହୃଦୟର ରାଣୀ
ତୁ ମୃଗ ନୟନୀ ତୋ ବାଙ୍କ ଚାହାଁଣୀ
ମନକୁ ନଉଛି ଟାଣି ॥

ହୃଦୟେ ଖେଳୁଛି ଶିହରଣ ମୋର
ଦେଖିଲା ପରଠୁ ତୋତେ
ଥରୁଟିଏ ଚାହିଁ କହିଦିଏ ଥରେ
ଭଲପାଉ ବୋଲି ମୋତେ ॥


Post a Comment

0 Comments