Information

ଓଡିଆ ସାହିତ୍ୟ ଓ ସଂସ୍କୃତିର ନିଆରା ସ୍ଵର... ତିନିଶହରୁ ଉର୍ଦ୍ଧ ଲେଖକ ଲେଖିକା ଏବଂ ଦୁଇଲକ୍ଷରୁ ଉର୍ଦ୍ଧ ପାଠକ ପାଠିକା ମାନଙ୍କର ପ୍ରିୟ ଇ-ସାହିତ୍ୟ ପୋର୍ଟାଲ ବଣମଲ୍ଲୀର ମହକ ଆପଣଙ୍କୁ ସ୍ଵାଗତ ଜଣାଉଛି ।

ଶହୀଦର ଚିଠି - ପ୍ରଶାନ୍ତ କୁମାର ନାଥ

ପ୍ରଶାନ୍ତ କୁମାର ନାଥ
ସୁନ୍ଦରପୁର, ଉତ୍ତରକୂଳହାଟ, ପ୍ରୀତିପୁର, ଯାଜପୁର
ଦୂରଭାଷ : ୮୮୯୨୩୦୧୧୪୩

ଯୁଦ୍ଧ ଲାଗିଥିଲା ଭାରତ ସୀମାରେ
ଦେଉଥିଲେ ପ୍ରାଣବଳୀ
ଗୁଳି ବାଜିଗଲା ଯବାନ ଛାତିରେ
ପଡିଲା ସେଇଠି ଟଳି ।
ଜାଣିଗଲା ଯେବେ ସହିଦ ହୋଇବ
ଦେଶପ୍ରେମ ଦୀପଜାଳି
ଚିଠିସେ ଲେଖିଲା ଘରକୁ ତାହାର
ରକତକୁ କରି କାଳି ।

ବାପାକୁ ଲେଖିଲା ଖୁସି ହେବ ଜାଣି
ସହିଦ ହୋଇଛି ପୁଅ
ମୋ କଥାକୁ ଭାବି କନ୍ଦିବାନି କେବେ
ଝରାଇ ଆଖିରୁ ଲୁହ ।
ମଥା ଟେକି ବାଟ ଚାଲିଥିବା ତୁମେ
ଫୁଲାଇ ନିଜର ଛାତି
ମନ ଦମ୍ଭ କରି ଗର୍ବରେ କହିବ
ପୁଅର ଯେ ଦେଶପ୍ରୀତି ।


ମାଆ ଚାହିଁଥିଲା ପୁଅର ବାଟକୁ
ଲେଖିଲା ମାଆକୁ ତାର
ଭାଳି ହେବୁ ନାହିଁ ଅଧମ ପୁଅକୁ
ଯାଉ ଅଛି ବହୁ ଦୂର ।
ଲୁହ ଢାଳିବୁନି ମୋକଥାକୁ ଭାବି
ଦେଉଛି ତୋତେଲୋ ରାଣ
ଜାଣି ଖୁସି ହେବୁ ଭାରତ ମାତାକୁ
ଦେଇଛି ଆଜିମୁଁ ପ୍ରାଣ ।

ପତ୍ନୀ ଚାହିଁଥିଲା ଫେରିବା ବାଟକୁ
ଲେଖିଲା ପତ୍ନୀକୁ ଚିଠି
ଭାଳି ହେବ ନାହିଁ କଥାକୁ ମୋହର
ଆସିଯିବ ଯେବେ ରାତି ।
ସନ୍ତକ ମୋହର ଛାଡି ମୁଁ ଆସିଛି
ମୁନା (ପୁଅ) ରୂପେ ତୁମ କୋଳେ
ମୋ ପରି ତାକୁ ବି ସୈନିକ କରିବ
ଲାଗି ତୁୁମେ କଳେ ବଳେ ।


ଘରେ ଥିଲା ତାର ସାନ ଭଉଣୀଟେ
ଥିଲା ଭାରି ଅଲିଆଳି
ତପାଇଁ ଲେଖିଲା ମମତାର ଚିଠି
ଆଖିର ଲୁହକୁ ଢାଳି ।
କାନ୍ଦିବୁନି କେବେ ରାକ୍ଷୀ ପୁନେଇଁ ରେ
ରାକ୍ଷୀ ଟେ ବାନ୍ଧିବା ପାଇଁ
ଭାବିନେବୁ ମନେ ଭାଇ ତୋ ଯାଇଛି
ମାଆ ର ସୁରକ୍ଷା ପାଇଁ ।

ଶେଷରେ ଲେଖିଲା ମୁନା ପାଇଁ କିଛି
ଛାତିକୁ ପଥର କରି
କ୍ଷମା କରିଦେବୁ,ଯାଉଛି ଆଜି ମୁଁ
ବାପଛେଉଣ୍ଡଟେ କରି ।
ଜୀବନରେ କେବେ ହାରି ଯିବୁ ନାହିଁ
ଥିବି ତୋର ସାଥେ ସାଥେ
ବାପା ତୋ ସହିଦ ହୋଇଅଛି ବୋଲି
ଜାଣିବେ ସାରା ଜଗତେ ।


ଚିଠି ଲେଖୁ ଲେଖୁ ଜୟହିନ୍ଦ କହି
ଗଲାସେ ସହିଦ ହୋଇ
ଚିଠି ସାଥେ ପୁଣି ଶବ ପହଁଚିଲା
ଗାଆଁରେ ତାହାର ଯାଇ ।
ସଭିଙ୍କ ସାମ୍ନାରେ ସହିଦର ଚିଠି
ପଢା ଯେବେ ସରିଗଲା
ସଭିଙ୍କ ଆଖିର ଲୁହର ସାଗରେ
ଶବ ପୁରା ଭିଜିଥିଲା ।

Post a Comment

1 Comments

  1. ଲକ୍ଷ୍ମୀନାରାୟଣ ପଟ୍ଟନାୟକ, ଖୋରଧା12/25/2017

    ବହୁତ ସୁନ୍ଦର କବିତା

    ReplyDelete

ଉପରୋକ୍ତ ବିଷୟଟି ଆପଣଙ୍କୁ କେମିତି ଲାଗିଲା ଦୟାକରି ନିଜର ମତାମତ ରଖନ୍ତୁ । ଆପଣଙ୍କ ଗଠନ ମୂଳକ ମତାମତ ନିଶ୍ଚୟ ବଣମଲ୍ଲୀର ମହକର ସମସ୍ତ ଲେଖକ ଲେଖିକା ମାନଙ୍କ ନିମନ୍ତେ ପ୍ରେରଣାଦାୟକ ହୋଇ ପାରିବ । ନିମ୍ନୋକ୍ତ କୋଠରୀ ମଧ୍ୟରେ ଆପଣଙ୍କ ମତାମତ ପ୍ରଦାନ କରନ୍ତୁ ।