Children World

ଓଡିଆ ସାହିତ୍ୟ ଓ ସଂସ୍କୃତିର ନିଆରା ସ୍ଵର... ତିନିଶହରୁ ଉର୍ଦ୍ଧ ଲେଖକ ଲେଖିକା ଏବଂ ଦୁଇଲକ୍ଷରୁ ଉର୍ଦ୍ଧ ପାଠକ ପାଠିକା ମାନଙ୍କର ପ୍ରିୟ ଇ-ସାହିତ୍ୟ ୱେବ ପୋର୍ଟାଲ ବଣମଲ୍ଲୀର ମହକ ଆପଣଙ୍କୁ ସ୍ଵାଗତ ଜଣାଉଛି ।

ସତ୍ୟନ୍ଵେଷୀ - ପ୍ରସନ୍ନ କୁମାର ମାଦଳା

ପ୍ରସନ୍ନ କୁମାର ମାଦଳା
ଘର ନଂ - ଏଫ୍ / ୧୩ , ସେକ୍ଟର- ୪, ରାଉରକେଲା- ୨
ଦୂରଭାଷ - ୭୯୭୮୧୯୨୨୨୭

ହାନିଲାଭର ଏ ଚୋରା ବଜାରରେ
ଚରିତ୍ରର ଶେଷ ପୁଞ୍ଜି
ମନ୍ଦ ପରିଣାମେ ଖର୍ଚ୍ଚ ହେଲା ପରେ
ଫେରି ଆସେ ମଥା ଗୁଞ୍ଜି ।
ଧର୍ମର ସ୍ଥାପନେ ଯୁଦ୍ଧର ଘୋଷଣା
କଲେ ବୋଲି ମାନ୍ୟ ଗଣ୍ୟ
ବିଗ୍ରହ ପ୍ରାଣରେ ପଡୁଥିଲା ଜଣା
ସୁବିଧାବାଦ ହିଁ ପଣ୍ୟ ।
ହରିଜନ କେତେ କପଟୀ କବଳେ
ହାରିଲେ ନିଜର ବାସ
ପ୍ରଗତିର ପଥେ ଗରିବ ସକଳେ
ବିବଶେ ଦେଲେଣି ଝାସ ।
ଶାନ୍ତିର ପଦକ ହେଲା ବିଭୂଷଣ
ଯୁଦ୍ଧ ଘୋଷକଙ୍କ ଶିରେ
ସତ୍ୟର ସନ୍ଧାନେ ଯେତେକ ଦୂଷଣ
ଆଗେଇ ଆସିଲେ ଧୀରେ ।
ଲଙ୍ଘି କି ପାରଇ ଅଚଳ ଏ ଘଣ୍ଟା
ଦାରିଦ୍ର୍ୟ ସୀମାର ରେଖା
ଭୋକିଲା ଚାଷୀର ଭାଙ୍ଗିଯାଏ ଅଣ୍ଟା
ସତେ କି କପାଳେ ଲେଖା ।
ଭରା ଦେଇଥିବା ଲାଠି ବି ଉଠାଏ
ନିର୍ଯାତନାର ସେ ଭାର
ଆପଣା ଲୋକ ତ ଛଡାନ୍ତେ ମୁଠାଏ
ସମତା ବିଚାର ତା'ର ।
କଳ୍ପିତ ସତ୍ୟର ଚିତ୍ରପଟ ଯେତେ
ବହଳ ଚଷମା ଦେଖେ
ଚାଖଣ୍ଡେ କନାରେ ଅଶ୍ଳିଳତା କେତେ
ଗାନ୍ଧୀ ଇତିହାସ ଲେଖେ ।
ଛୁଟି ନେଇଯାଏ ସେହି ଇତିହାସ
ପ୍ରାଚୀନ ପ୍ରସ୍ତର ଛାଡି
ଆତତାୟୀ ହାତେ କରେ ପରିହାସ
ବନ୍ଧୁକରୁ ମୁହଁ କାଢି ।
ଆଉ ଯେତେ ସତ୍ୟ କଲି ଅନ୍ବେଷଣ
ଫିଟିଲେ ଗୁମର କଥା
ପାଠକ ବିଚାରା କଲେ ବିଶ୍ଳେଷଣ
ହୃଦୟେ ଭରିବ ବ୍ୟଥା ।

Post a Comment

0 Comments