ରୂପସୀ ଚିଲିକା - ଧ୍ରୁବ ଚରଣ ବେହେରା

ରୂପସୀ ଚିଲିକା - ଧ୍ରୁବ ଚରଣ ବେହେରା

ଧୃବ ଚରଣ ବେହେରା
ଅଠରବାଟିଆ, ବାଲୁଗାଁ, ଖୋରଧା

ସ୍ଵପ୍ନମୟୀ ତୁହି ସୁନ୍ଦରୀ ରୂପସୀ
ପ୍ରକୃତିର ମହାରାଣୀ
ନୀଳ ନୀଳ ଢେଭ ସଜାଇ ତନୁରେ
ଲାଗୁଛୁ ଚାରୁ ତରୁଣୀ ॥

ମରାଳର ମାଳ କରି ରୂପା ହାର
ପିନ୍ଧିଛୁ ଗଳାରେ ଘେରି
ସମୀର ବହନ୍ତେ ଝୁଲି ନାଚୁଥାଉ
ସତେ କିବା ଅପସରୀ ॥


ସୁନେଲୀ ସକାଳେ ପଖାଳୁଛୁ ଦେହ
ରାତିର ବସନ ଧୋଇ
ନିତି ସଞ୍ଜ ବେଳେ ପ୍ରଣାମ କରୁଛୁ
ରବି ହସୁଥିଲେ ଉଇଁ ॥

ଗୋଧୂଳି ଲଗନେ ତୋ ରୂପ ଲାଗଇ
ସତେ ଅବା ଅପରୂପା
ବିହଙ୍ଗମ ମାଳେ ଶୁଣୁଛୁ ରାଗିଣୀ
ମନ ତୋର ସ୍ଵର୍ଣ୍ଣ ଚମ୍ପା ॥


ପୂର୍ଣ୍ଣିମାର ଉଷା ଢାଳଇ ଜୋଛନା
ତୋ ଯୁବା ବୟସ ଦେଖି
ରାତିର ଶେଯରେ ଶୋଇ ଚେଇଁ ଥାଉ
ଲାଗୁ ତୁ ବଡ ପ୍ରେୟସୀ ॥

ପ୍ରୀତିମୟୀ ଲାଗେ ତୋ ବେଶ ମାଧୁରୀ
ଶୀତଳତା ବହେ ଅଙ୍ଗେ
ତୋର ରୂପ ଯୌବନ ଦେଖିଦେଲେ ଥରେ
ମନ ଲାଗଇ ସର୍ବାଙ୍ଗେ ॥


କବି ଭାବୁକଙ୍କ ମନର ମାନସୀ
ହୃଦୟ ନୌକାରେ ବସି
ଲେଖିଦେଉ କେତେ କାହାଣୀ କବିତା
ମନେ ମନେ ହୋଇ ଖୁସି ॥

ରୂପରେ ଭରିଛି କେତେ ଅତୀତର
ଅଭୁଲା ପୀରତି ପ୍ରେମ
ସଦା ହସୁଥାଉ ପ୍ରକୃତିର କୋଳେ
ମେନକା ଉର୍ବଶୀ ସମ ॥


ସୌନ୍ଦର୍ଯ୍ୟର ଲାଗି ଅଟୁ ଗନ୍ତାଘର
ମନକୁ ଟାଣୁ ତୁ ଏକା
ଚାରୂକଳା ଭରା ଏସିଆ ସୁନ୍ଦରୀ
ନୂଆ ବୋହୂ ତୁ ଚିଲିକା ॥

2 Comments

  1. ଧ୍ରୁବ ଚରଣ ବେହେରାOctober 27, 2017 at 10:28 PM

    ଶରତ ଗୋଧୂଳି

    ଶରତ ଗୋଧୂଳି ହସୁଛି ଧରାରେ
    ସବୁଜିମା ସଖୀ ମେଳେ
    ସୂରୁଯ କିରଣେ ଲାଜେଇ ଧରଣୀ
    ଓଢଣା ଢାଙ୍କିଛି ଛଳେ ।।
    କିଛିକ୍ଷଣ ଲାଗି ସୁନା ବସନରେ
    ସଜାଇଛି ଦେହ ତାର
    ସଂନ୍ଧ୍ଯା ଚାଲିଯିବ ଚୁମ୍ବନ ଟେ ଦେଇ
    ହେବ ସେ ଆଉ କାହାର ।।
    ଏମିତି ବେଳରେ ଅଗଣାଟି ତାର
    ଲାଗଇ ରଙ୍ଗ ମହଲ
    ବିହଙ୍ଗମ ମାଳେ ଶୁଣେ ସେ ରାଗିଣୀ
    ଦିଶେ ବଡ ଝଲମଲ ।।
    କାଶତଣ୍ଡି ନାଚେ ବିଲ ହୁଡାମାଳେ
    ଦେଖି ଏହି ସ୍ଵୟଂମ୍ବର
    ସମୀର ସାଥିରେ ମାତୁଥାଏ ସିଏ
    କହେ ମତୁଆଲା ଗୀର ।।
    ଅଭୟ ଦାୟିନୀ ଶକ୍ତି ପ୍ରଦାୟନୀ
    ଆସିଛନ୍ତି ଧରା ଧାମେ
    ଅଲୌକିକ ଧାରା ଢାଳି ଦେବ ବସି
    ଚାନ୍ଦିର ମେଢ ଉପରେ ।।
    ସିନଗ୍ଧ ଶରତର ଗୋଧୂଳି ବେଳରେ
    ଦୋଳିଖେଳ ପ୍ରାଣୀ ମନ
    ଲାଗୁଥାଏ ସତେ ଏ ମର୍ତ୍ତ୍ୟ ଭୂବନ
    ଦେବ ନନ୍ଦନକାନନ ।।
    ଏମିତି ମୂହୁର୍ତ୍ତେ ଗାଁଆ ଶୋଭାଦିଶେ
    ସାଧବ ବୋହୂ କି ପରୀ
    ଶରତ କାଳୀନ ଗୋଧୂଳି ବେଳକୁ
    ହେବନି ମନୁ ପାଶୋରି ।।

    ReplyDelete
  2. […] ଏହାର ପୂର୍ବ ପ୍ରକାଶିତ ପ୍ରଥମଭାଗଟି ପଢନ୍ତ… […]

    ReplyDelete

ବଣମଲ୍ଲୀର ମହକ ତାହାର ପାଠକ ପାଠିକା ମାନଙ୍କ ନିକଟରୁ ସର୍ବଦା ଗଠନମୂଳକ ମତାମତ ଆଶା କରିଥାଏ । ଯାହାକି ଜଣେ ସ୍ରଷ୍ଟାଙ୍କୁ ଉଚିତ ମାର୍ଗ ପ୍ରଦର୍ଶନ କରିବାରେ ସକ୍ଷମ ହୁଏ । ଯଦି Anonymous User ଭାବେ ଆପଣ ଉପରୋକ୍ତ ବିଷୟଟି ଉପରେ ନିଜର ମତାମତ ପ୍ରଦାନ କରିବାକୁ ଚାହୁଁଛନ୍ତି, ତେବେ ନିଜର ମତାମତ ତଳେ ଆପଣଙ୍କ ନାମ ଓ ଠିକଣା ପ୍ରଦାନ କରିବାକୁ ଅନୁରୋଧ ।