Information

ଏମିତି ଏକ ମିଳନ୍ତା ସାଥୀ

ରଙ୍ଗନାଥ ରଥ
ବଡ଼ଗଡ଼ ବ୍ରିଟ୍ କଲୋନୀ, ଭୁବନେଶ୍ୱର

ଖୋଜୁଛି ଏକ ଦରଦୀ ସାଥୀ
ହଜାଇ ଦେଇ ଛାତିରୁ ତାତି
ଭିଜା ନୟନ ପୋଛି;
ମନଗହନ ଅକୁହା କଥା
ବୁଝି ହରନ୍ତା ଅନ୍ତର ବ୍ୟଥା
ଲଭନ୍ତି ଶାନ୍ତି କିଛି ॥୧॥

ଏମିତି ଏକ ମିଳନ୍ତା ସାଥୀ
କରନ୍ତା ଦୂର ମନରୁ ଭ୍ରାନ୍ତି
ଜୀବନେ ସାଜି ଫୁଲ;
ସ୍ନେହ ସରାଗେ ହସନ୍ତି ଲୋଟି
ଆପଣାପଣ ଦିଅନ୍ତି ଭେଟି
ପା'ନ୍ତି ଅମୂଲ ମୂଲ ॥୨॥


ପରିବାରରୁ ସମାଜ ଯାଏଁ
ଅନ୍ତରତମ ସାଥୀ ନ ପାଏ
ଭାଗ ନେବାକୁ ଦୁଃଖ;
ବେଦନା ସିକ୍ତ ପରାଣ କାନ୍ଦେ
ସୁନା ପଞ୍ଜୁରି ସଂସାର ବାନ୍ଧେ
ତଥାପି ଖୋଜେ ସୁଖ ॥୩॥

ଯାହାକୁ ମଣେ ନିଜର ବୋଲି
ଯାଏ ସେ ମୋତେ ପାଦରେ ଠେଲି
ନ କରି ଆପଣାର;
ଅଭିମାନର ତାତିଲା ବାଲି
ଜୀବନଟାକୁ ଜଳାଏ ଖାଲି
ସତେ କି ଅବା ପର ॥୪॥


ସପନ ମୋର ଯାଉଛି ହଜି
ବିଷଣ୍ଣତାରେ କାହିଁକି ଭିଜି
ସାଉଁଟେ ତା'ର ରୂପ;
କଳାବଉଦେ ଆସି ବିଜୁଳି
ଆଶା କଦମ୍ବ ଉଠଇ ଝଳି
ଅମା ଅନ୍ଧାରେ ଦୀପ ॥୫॥

ହୃଦୟ ତନ୍ତ୍ରୀ ଝଙ୍କାର ତୋଳି
ବାଜି ଉଠନ୍ତା ମମତା ବୋଳି
ହେଲେ ସେ ଆପଣାର;
ନିରାଶା ଯେତେ ଯାଆନ୍ତା ଚାଲି
ଜୈତ୍ର ନାଦ କରନ୍ତି ଖାଲି
ଏ ବିଶ୍ୱ ପରିବାର ॥୬॥


ସକଳ ଆଶା ମୋ ପ୍ରଶ୍ନବାଚୀ
ମିଳେନା ସାଥୀ ପାଏନା ସୂଚୀ
ଦେବ କି କେହି ଖୋଜି;
ଭାବନା ଭରା ହୃଦ କନ୍ଦରେ
କରନ୍ତି ପୂଜା ମନ ମନ୍ଦିରେ
ପରାଣ ରଖି ବାଜି ॥୭॥

ଏକଇ ସାଥୀ ସୁଖଦୁଃଖର
ସେହି ତ ସତ୍ୟ ଶିବ ସୁନ୍ଦର
ଦିଏନା ଦେଖା କେବେ;
ଦିବ୍ୟଚେତନା ମନେ ମୋ ଜାଗେ
ନାହିଁ ସେ କାହିଁ କେଉଁ ସରଗେ
ମିଳେ ତିତିକ୍ଷା ଭାବେ ॥୮॥

Post a Comment