Children World

ଓଡିଆ ସାହିତ୍ୟ ଓ ସଂସ୍କୃତିର ନିଆରା ସ୍ଵର... ତିନିଶହରୁ ଉର୍ଦ୍ଧ ଲେଖକ ଲେଖିକା ଏବଂ ଦୁଇଲକ୍ଷରୁ ଉର୍ଦ୍ଧ ପାଠକ ପାଠିକା ମାନଙ୍କର ପ୍ରିୟ ଇ-ସାହିତ୍ୟ ୱେବ ପୋର୍ଟାଲ ବଣମଲ୍ଲୀର ମହକ ଆପଣଙ୍କୁ ସ୍ଵାଗତ ଜଣାଉଛି ।

ଅପରୂପା ଅପସରୀ

ପ୍ରକାଶ କୁମାର ଚାନ୍ଦ
ଜଯପୁର ଶାସନ, ପିପିଲି, ପୁରୀ

ରୂପ ରାଇଜର ରାଜକୁମାରୀ ତୁ
ସରଗ ରାଇଜ ପରୀ
ସତେ କି ଆସିଛୁ ସରଗୁ ଓହ୍ଲେଇ
ଅପରୂପା ଅପସରୀ ॥

ମଳୟ ତ ଛୁଇଁ ତୋହରି ଦେହକୁ
ଚନ୍ଦନ ଚନ୍ଦନ ବାସେ
ଗଛରେ ଧରିନି ବଉଳର କଷି
ତଥାପି ଫଗୁଣ ହସେ ॥

ହସିଦେଲେ ତୁହି ଖାଲ ପଡିଯାଏ
ଗୋରୀ ତୋର ଗୋରା ଗାଲ
ପ୍ରଜାପତି ମନ ହୁଏ ହାଇଁପାଇଁ
କରିବାକୁ ତତେ ଗେଲ ॥

ସହି ପାରୁନାହିଁ ଆଉ ଚନ୍ଦ୍ରଭାନୁ
ଈର୍ଷାରେ ଯାଉଛି ଜଳି
ରୂପ ତୋର ଦେଖି ଝାଉଁଳି ପଡୁଛି
ଲକ୍ଷେ ପଦୁଅଁର କଳି ॥

ଯେବେଠାରୁ ତୁହି ସତର ଡେଇଁକି
ଅଠରରେ ଦେଲୁ ପାଦ
ସେଇଦିନ ଠାରୁ ସଭିଙ୍କ ଆଖିରୁ
ମିଳେଇ ଯାଇଛି ନିଦ ॥

କାହା ଅଗଣାରେ ହୋଇବୁ ତୁଳସୀ
କିଏ ସେହି ଭାଗ୍ୟବାନ
ସତେକି ଲୋ ସିଏ ସାତଜନ୍ମ ପାଇଁ
କରିଅଛି ବୋଧେ ପୂଣ୍ୟ ॥

Post a Comment

0 Comments